मंत्री उदय सामंतांनी गिरवली तावडेंची 'डिग्री'

राज्याचे नवनियुक्त उच्च व तंत्रशिक्षण मंत्री उदय सामंत यांनी शिखर संस्थांची मान्यता नसलेल्या ज्ञानेश्वर विद्यापीठातून ऑटोमोबाइल इंजिनीअरिंगचा डिप्लोमा केल्याचे प्रतिज्ञापत्रातून समोर आले आहे. राज्याचे माजी उच्च व तंत्रशिक्षण मंत्री विनोद तावडे यांची इंजिनीअरिंगची पदवीसुद्धा याच विद्यापीठाची होती. त्यामुळे तावडेंना झालेला विरोध आता सामंतांना सहन करावा लागणार असून, त्यांच्या अडचणीत वाढ होण्याची शक्यता आहे.

मुख्यमंत्री उद्धव ठाकरे यांनी रविवारी खातेवाटप जाहीर केल्यानंतर, सामंत यांच्यावर उच्च व तंत्रशिक्षण खात्याचा पदभार देण्यात आला आहे. सामंत यांनी २०१९ च्या विधानसभा निवडणुकीत सादर केलेल्या प्रतिज्ञापत्रात, त्यांनी आपण पुण्यातील ज्ञानेश्वर विद्यापीठातून ऑटोमोबाइल इंजिनीअरिंगचा डिप्लोमा केल्याची माहिती दिली आहे. या प्रतिज्ञापत्रानुसार त्यांचे शालेय शिक्षण हे महाराष्ट्र राज्य माध्यमिक आणि उच्च माध्यमिक शिक्षण मंडळातून झाले आहे. त्यानंतर त्यांनी ज्ञानेश्वर विद्यापीठातून ऑटोमोबाइल इंजिनीअरिंगचा डिप्लोमा केल्याची माहिती दिली आहे. याव्यतिरिक्त कोणतचे शिक्षण त्यांनी घेतलेले नाही. या निमित्ताने मान्यता नसलेल्या विद्यापीठाचा डिप्लोमा करणाऱ्या सामंत यांच्या शैक्षणिक पात्रतेबाबत जोरदार चर्चा सुरू झाली आहे. ज्ञानेश्वर विद्यापीठाला विद्यापीठ अनुदान आयोग, अखिल भारतीय तंत्रशिक्षण परिषद, महाराष्ट्र राज्य तंत्रशिक्षण मंडळ, तंत्रशिक्षण संचालनालय अशा कोणत्याच प्रशासकीय शिखर संस्थेची मान्यता नाही. त्यामुळे या विद्यापीठातून घेतलेला डिप्लोमा हा बोगस ठरतो. याबाबत डॉ. अभिषेक हरिदास यांनी सांगितले की, ज्ञानेश्वर विद्यापीठाची स्थापना राज्य आणि केंद्र सरकारने केलेली नाही. त्यामुळे हे बोगस विद्यापीठ ठरते. या विद्यापीठातून डिप्लोमा घेतलेल्या उच्च व तंत्रशिक्षण मंत्री राज्याला लाभल्याने शिक्षण व्ववस्था लयाला जाईल आणि बोगस शिक्षणसंस्थाचालकांना अभय मिळेल, असे डॉ. हरिदास यांनी सांगितले. दरम्यान, उदय सामंत यांना संपर्क केला असता, तो होऊ शकला नाही.

तावडेंवर आरोप करणारे आता सत्तेत

माजी उच्च व तंत्रशिक्षण मंत्री विनोद तावडे यांची इंजिनीअरिंगची पदवी ज्ञानेश्वर विद्यापीठाची असल्याने मोठा गदारोळ झाला होता. त्या वेळी विरोधी पक्षाच्या नेत्यांनी तावडे यांच्यावर गंभीर आरोप केले होते. आता विरोध करणारे सत्तेत आले आहेत. त्यामुळे सामंत यांच्या शैक्षणिक पात्रतेविषयी विरोधकांकडून राज्यात काय प्रतिक्रिया उमटतात, हे पाहणे उत्सुकतेचे ठरणार आहे. दरम्यान, राज्याला शैक्षणिक पात्रता नसलेल्या व्यक्ती उच्च व तंत्रशिक्षण मंत्री म्हणून लाभतात तरी कशा, अशा जोरदार चर्चेला शैक्षणिक वर्तुळात सुरुवात झाली आहे.