नवी दिल्ली : अमेरिका आणि इराणमधील वाढत्या संघर्षाने जागतिक कमोडिटी बाजारात मोठी उलथापालथ सुरु आहे.मध्य पूर्वेत युद्धजन्य परिस्थिती निर्माण झाल्याने सोने मागणीत प्रचंड वाढ झाली असून जागतिक कमोडिटी बाजारात गेला आहे. शेअर बाजारात नफा वसुली करून गुंतवणूकदार सोन्यामध्ये गुंतवणूक करत आहेत. मल्टी कमोडिटी एक्सचेंजमध्ये सोन्याचा भाव ८५२ रुपयांनी वधारून ४० हजार ९६४ रुपयांवर गेला आहे. सकाळच्या सत्रात सोने ४१ हजार ९६ रुपयांपर्यंत वाढले होते. मागील दोन सत्रात सोने १८०० रुपयांनी महागले आहे.

अमेरिकेच्या हवाई हल्ल्याने मध्य पूर्वेतील राजकीय अस्थिरता निर्माण झाली आहे. शेअर बाजारात घसरण होत असून गुंतवणूकदार सुरक्षित गुंतवणूक पर्याय म्हणून सोने गुंतवणुकीला प्राधान्य देत आहेत. इराणच्या कद्स फोर्सचा प्रमुख मेजर जनरल कासिम सुलेमानी हा अमेरिकेने बगदादमध्ये केलेल्या हवाई हल्ल्यात मारला गेला आहे. या वृत्तानंतर जगभरातील कमोडिटी आणि शेअर बाजारांवर पडसाद उमटले. मागील दोन सत्रात कमोडिटी बाजारात सोने १८०० रुपयांनी महागले आहे. यामुळे लग्नसराईसाठी सोने खरेदीच्या बेतात असणाऱ्या ग्राहकांच्या चिंतेत भर पडली आहे. जागतिक आणि देशांतर्गत अस्थिरतेने धास्तावलेल्या गुंतवणूकदारांनी शेअर बाजार उघडताच जोरदार विक्री केली. यामुळे सकाळच्या सत्रात सेन्सेक्स ५०० अंकांनी गडगडला तर राष्ट्रीय शेअर बाजाराच्या निफ्टीत तब्बल १४० अंकांची पडझड झाली. चलन बाजारात डॉलरच्या तुलनेत रुपयात ३१ पैशांचे अवमूल्यन झाले. तो ७२. ११ वर व्यवहार करत आहेत.

सोने १.४ टक्क्याने वधारले
जागतिक कमोडिटी बाजारात स्पॉट गोल्डचा दर १.४ टक्क्याने वाढला असून तो १५७३ डॉलर प्रति औस गेला आहे. १० एप्रिल २०१३ नंतर सोन्याचा हा जागतिक बाजारातील आतापर्यंतचा सर्वाधिक दर आहे. अमेरिकी बाजारात गोल्ड फ्युचर्समध्ये १.६ टक्क्याची वाढ झाली असून सोन्याचा भाव १५७७.८० डॉलर झाला आहे.

चांदी तेजीने चकाकली सोन्याप्रमाणे चांदीच्या दरात तेजी दिसून आली आहे. मल्टी कमोडिटी बाजारात चांदीचा भाव ७२४ रुपयांनी वधारला असून प्रति किलो ४८२५१ रुपये झाला आहे. सकाळच्या सत्रात चांदीने ४८६६० रुपयांचा उच्चाक गाठला होता.

Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times

LEAVE A REPLY

Please enter your comment!
Please enter your name here