nashik firing, कारमधून तिघे आले, तरुणावर कोयत्यानं वार, गोळीबाराचा थरार, दुचाकी पळवली, नाशिक हादरलं – nashik firing three person came from car and firing and injured with arm and steal two wheeler of person from satpur

नाशिकः नाशिक शहरातील सातपूर परिसरात भर दिवसा गोळीबार झाल्यानंतर नाशिक शहरात खळबळ उडाली आहे. शहरातील सातपूर पोलीस ठाण्याच्या हद्दीत असलेल्या कार्बन नाका परिसरात गोळीबार झाल्याची माहिती मिळाली आहे. गोळीबाराच्या घटनेनंतर परिसरातील व्यवसायिक व नागरिकांमध्ये देखील प्रचंड घबराटीचे वातावरण पसरले आहे. घटनेची माहिती मिळताच पोलीस आणि गुन्हे शाखेचं पथक घटनास्थळी दाखल झालं होतं. पोलिसांनी केलेल्या प्राथमिक तपासानंतर वसुलीच्या वादातून हा प्रकार घडल्याचं समोर येत आहे. पैसे वसूल करण्यासाठी एकाला अडवून त्याच्या दिशेने गोळी झाडण्यात आल्याचं समोर आलं आहे. या घटनेत एक जण जखमी असून त्याच्यावर खासगी रुग्णालयात उपचार करण्यात येत आहेत.

याबाबत मिळालेली अधिक माहिती अशी की, सातपूर पोलीस ठाण्याच्या हद्दीत असलेल्या कार्बन नाका परिसरात महिंद्रा सोना कंपनी समोर दोन कार एकमेकांसमोर आल्यानंतर एकाने गोळी झाडली आहे. पूर्ववैमनस्यातून हा गोळीबार झाल्याची माहिती मिळाली आहे. भर दिवसा तरुणावर जीवघेणा हल्ला झाला आहे. आपसातील जुन्या वादातून तिघांनी तरुणावर गोळीबार तसेच कोयत्याने वार केले. यानंतर मारेकऱ्यांनी आपले वाहन घटनास्थळी सोडून कामगाराला धाक दाखवत त्याच्या दुचाकीने पळ काढला. ही सिनेस्टाईल घटना रविवारी दुपारी घडली.

रविवारी दुपारी तपन जाधव आपल्या चारचाकीमधून ( एमएच ०४ ईएक्स५६७८ ) ने प्रवास करत असताना कार्बन नाका परिसरात आरोपी आशिष जाधव आपल्या २ साथीदारांसह ( एमएच १५ डीएम७६३९) या वाहनातून आला. त्यानं तपनच्या गाडीला धडक दिली. यानंतर गाडीखाली उतरत त्याच्यावर कोयत्याने वार केले, यासह गोळीबार केला.तिघांनी मिळून केलेल्या या हल्ल्यात तपन जाधव गंभीररित्या जखमी झाला असून त्यांच्यावर उपचार सुरु आहेत.

नाशिकच्या येवल्यामधील २९ वर्षीय जवानाला वीरमरण, राजस्थानमध्ये घडली दुर्दैवी घटना

घटनेनंतर धडक बसल्याने आरोपींची गाडी बंद पडली होती. यामुळे त्या मार्गावरुन जाण्याऱ्य़ा एका कामगाराला आरोपींनी थांबवले. बंदूक अन् कोयत्याचा धाक दाखवत त्या कामगाराची दुचाकी (एमएच १५ एफयू ७६५६) घेऊन आरोपींनी घटनस्थळावरुन पळ काढला.या घटनेमुळे परिसरात राहणाऱ्या नागरिकांमध्ये प्रचंड दहशत निर्माण झाली आहे.

बावनकुळे जागावाटपाबद्दल बोलून गेले, पुण्यात शिंदे समर्थक नेत्याचं टेन्शन वाढलं, विधानसभेच्या मिशनला धक्का?

मागच्या आठवड्यात नाशिकच्या पंचवटी परिसरात गोळीबार झाल्याची घटना घडली होती. त्यानंतर आता पुन्हा एकदा सातपूर परिसरात गोळीबार झाला आहे. त्यामुळे शहरातील वाढती गुन्हेगारी रोखण्याचे आव्हान पोलिसांपुढे उभे राहीले आहे. घटनेची माहिती मिळताच शहर गुन्हेशाखा, सातपूर पोलिसांसह वरिष्ठ अधिकाऱ्यांनी घटनास्थळी धाव घेतली आहे. सदर घटनेचा पुढील तपास पोलीस करत आहेत.

एकनाथ शिंदे यांच्या सभेपूर्वी संजय कदमांकडून करेक्ट कार्यक्रम, योगेश कदमांना धक्का, निकटवर्तीय फोडला