मुंबई: लालबागसारख्या मध्यवर्ती आणि गजबजलेल्या परिसरात काही दिवसांपूर्वी एका मुलीने आपल्या आईची हत्या केल्याचा प्रकार उघड झाला होता. रिंपल जैन (वय २४) हिने आपल्या आईचा वीणा जैन यांच्या मृतदेहाचे तुकडे करुन जवळपास तीन महिने ते घरातच ठेवले होते. हा सगळा प्रकार उघड झाल्यानंतर सर्वांनाच धक्का बसला होता. गेल्या काही दिवसांपासून मुंबई पोलीस रिंपल जैन हिची चौकशी करत आहेत. या तपासादरम्यान नवनवीन गोष्टी समोर येताना दिसत आहे. ताज्या माहितीनुसार, रिंपलने आपण आईच्या मृतदेहाची विल्हेवाट लावण्यासाठी ॲसिडचा वापर केल्याची कबुली दिली. पण रिंपलचा हा प्रयत्न फसल्याचेही चौकशीत निष्पन्न झाले आहे.
लेकीनं आईला संपवलं, तुकडे केले; ‘त्या’ दोन वेटर्सनी साथ दिली? लालबाग हत्याकांडाचं कनेक्शन यूपी, बंगालपर्यंत
रिंपल जैन हिने पोलिसांना दिलेल्या माहितीनुसार, तिने आईच्या मृतदेहाचे तुकडे करण्यासाठी जवळच्या हार्डवेअर शॉपमधून फरशी कापण्याची मशीन खरेदी केली. तर जवळच्याच एका मेडिकलच्या दुकानातून रिंपलने रुम फ्रेशनर्स, परफ्युम आणि फिनेल सोल्युशन विकत घेतले. यानंतर रिंपल घरी आली. तिने फरशी कापण्याच्या मशिनने वीणा जैन यांच्या मृतदेहाचे तुकडे केले. आईचे दोन्ही हात धडापासून वेगळे केल्यानंतर रिंपलने ते एका स्टीलच्या टाकीत ठेवले आणि त्यावर ॲसिड ओतले. आईचे हात ॲसिडमध्ये वितळतील, असे रिंपलला वाटले होते. पण तसे घडले नाही. कदाचित ॲसिडमध्ये हात वितळायला जास्त वेळ लागतो, असे रिंपलला वाटले. त्यामुळे रिंपलने आणखी चार तास वाट पाहिली. मात्र, त्यानंतरही वीणा जैन यांचे हात ॲसिडमध्ये वितळले नव्हते. यानंतर रिंपलने आईच्या मृतदेहाचे आणखी तुकडे केले. पण ॲसिडचा काही फायदा होत नाही हे लक्षात आल्यानंतर रिंपलने दुसरा पर्याय वापरायचा ठरवला. तिने वीणा जैन यांच्या मृतदेहाचे तुकड्यांपैकी काही भाग जाळण्याच प्रयत्न केला. आगीत जळून शरीराच्या भागांची राख होईल, अशी अपेक्षा रिंपलला होती. मात्र, रिंपलने शरीराचा एक तुकडा पेटवून दिला तेव्हा घरात प्रचंड धूर झाला. त्यामुळे आजुबाजूच्या लोकांचे लक्ष वेधले जाईल ही भीती वाटून रिंपलने पाणी टाकून आग विझवली. त्यानंतर रिंपलने अॅसिडमधील आईचे हातपाय आणि मृतदेहाचा जळालेला भाग तसाच ठेवून दिला, अशी माहिती समोर आली आहे.

घरात पाऊल ठेवताच उग्र दर्प; आईचं धड पिशवीत, हातपाय स्टीलच्या टाकीत; लालबाग हत्याकांडाची स्टार्ट टू एंड कहाणी

क्राईम सिरीज पाहून रिंपलला युक्ती सुचली

आईच्या मृतदेहाचे तुकडे करणे किंवा ते ॲसिडमध्ये टाकून ते वितळवण्याची युक्ती आपल्याला गुन्हेगारी मालिका पाहून सुचली, असेही रिंपल जैन हिने पोलिसांना सांगितले. आईच्या मृतदेहाची विल्हेवाट लावण्यासाठी रिंपलने मोबाईलवर काही सर्च केले होते का, याचा तपासही पोलिसांकडून सुरु आहे. ॲसिड टाकून आणि मृतदेह जाळून तो नष्ट करण्याचा प्रयत्न फसला तेव्हा रिंपलने मृतदेहाचे तुकडे तसेच ठेवून दिले. आईचा मृतदेह कुजेल आणि आपोआप नष्ट होईल, त्यानंतर कोणता पुरावाही मागे राहणार नाही, असे रिंपलला वाटले होते. इतर पर्यायांपेक्षा मृतदेह कुजून देणे, हाच योग्य मार्ग असल्याचे रिंपलला वाटले. यादरम्यान रिंपलने आई उपचारासाठी कानपूरला गेल्याचे नातेवाईक आणि शेजारच्यांना सांगितले. यानंतर रिंपलने काहीच घडले नाही या अविर्भावात आपले दैनंदिन आयुष्य जगायला सुरुवात केली होती. कुजलेल्या मृतदेहाचा वास लपवण्यासाठी ती एअर फ्रेशनर्स आण परफ्युम्सचा वापर करत होती.

LEAVE A REPLY

Please enter your comment!
Please enter your name here