भिकारी बनून आलेल्या महिलेने ५ वर्षीय मुलीला पळवून नेलं, पण…

चंदीगड: अवघ्या पाच वर्षीय मुलीचं अपहरण करून तिला एक लाख रुपयांना विकणाऱ्या दाम्पत्याला पोलिसांनी अटक केली आहे. भिकारी बनून ही महिला आली होती. तिनं दारिया गावातून या मुलीचं अपहरण केलं होतं. करणारं मोठं रॅकेट यामागे असू शकतं, असा संशय पोलिसांनी व्यक्त केला आहे.

चंदीगडमधील औद्योगिक परिसरातील पोलीस ठाण्याच्या पथकाने ही कारवाई केली. पोलीस अधिकारी हरमिंदरजित सिंग यांनी सांगितले की, साजन (वय ५०) आणि किरण (४५) हे मनीमाजरा येथील रहिवासी आहेत. या दाम्पत्याला अटक करण्यात आली आहे. दारिया गावातील रहिवासी सुनील कुमार यांनी या दाम्पत्याला पकडून देण्यात मोलाची मदत केली. घर क्रमांक ७१९ जवळ कुमार राहतात. रविवारी सकाळी साधारण अकराच्या सुमारास त्यांनी किरणला पाहिलं. ती भिकाऱ्याच्या वेषात तिथं आली होती. तो या मुलीला ओळखत होता. या परिसरातील घर क्रमांक ९५३ मध्ये ही मुलगी राहत होती. किरणनं मुलीला पळवून नेलं. सुनीलनं तिचा पाठलाग केला. दुचाकीवरून ती पतीसोबत निघाली. सुनीलला आरडाओरड सुरू केली. त्यानंतर आजूबाजूला असलेल्या लोकांच्या मदतीने तिला पकडलं. पतीनं त्यांच्या तावडीतून पळून जाण्याचा प्रयत्न केला. मात्र, रस्त्यावरून जाणाऱ्या इतर नागरिकांनी त्याला पकडलं.

या घटनेनंतर पोलीस घटनास्थळी पोहोचले. सुनील आणि मुलीच्या पालकांनी दोघांच्या विरोधात तक्रार दाखल केली. पोलिसांनी त्यांचा जबाब नोंदवून घेतला. तक्रारीनुसार, किरण जेव्हा मुलीला पळवून नेत होती तेव्हा सुनीलनं तिला विचारणा केली. त्यावेळी मुलीला तिच्या वडिलांकडे घेऊन जात असल्याची बतावणी तिनं केली. पोलिसांनी किरणकडे कसून चौकशी केली. काही दिवसांपूर्वी तिला एक व्यक्ती भेटली होती. मुलीसाठी १ लाख रुपये देणार असल्याचे त्या व्यक्तीने सांगितले होते. तिने सांगितलेल्या माहितीची सत्यता पडताळून पाहिली जात आहे. किरण आणि साजनला पाच मुलं आहेत. तसंच नातवंडेही आहेत, अशी माहिती पोलिसांनी दिली.

पोलिसांनी या आरोपी दाम्पत्याविरोधात कलम ३७० आणि कलम १२० ब अन्वये गुन्हा दाखल केला आहे. त्यांना स्थानिक न्यायालयात हजर करण्यात येणार आहे. त्यांना पोलीस कोठडी देण्याची मागणी केली जाणार आहे. यामागे मुलांची तस्करी करणारं मोठं रॅकेट सक्रिय आहे का? तसेच आजूबाजूच्या परिसरातील बेपत्ता मुलांची माहिती घेण्यात येत आहे, अशी माहिती पोलिसांनी दिली.