भूमिपूजनाच्या दिवशी दिवाळी साजरी करा, पण ढोलताशे वाजवू नका: पाटील

पुणे: येत्या ५ ऑगस्ट रोजी अयोध्येत राम मंदिराचं भूमिपूजन होणार असून त्या दिवशी घरावर गुड्या उभारून सामुहिक उत्सव साजरा करा. त्या दिवशी प्रत्येकाने घरोघरी दिवाळी साजरी करावी, मात्र हे करताना करोनाचे भान ठेवावे. तसेच त्या दिवशी कुणीही ढोलताशे वाजवू नये, असं आवाहन भाजपचे प्रदेशाध्यक्ष यांनी कार्यकर्त्यांना केलं आहे.

पंतप्रधान नरेंद्र मोदी यांच्या हस्ते अयोध्या येथे श्रीरामजन्मस्थानी भव्य मंदिराचा पायाभरणी समारंभ ५ ऑगस्ट रोजी होत असून आयुष्यातील हा महत्त्वाचा दिवस सर्वांनी वैयक्तिक पातळीवर घरोघरी दिवाळीसारखा साजरा करावा. मात्र सामुहिक उत्सव टाळावा आणि करोनाचे भान ठेवावे. ५ ऑगस्ट हा दिवस आपल्या सर्वांच्या आयुष्यातील एक महत्त्वाचा दिवस आहे. अयोध्या येथे श्रीरामजन्मस्थानी भव्य मंदिर व्हावे यासाठी आपण जगलो. त्या राममंदिराची पायाभरणी मोदींच्या हस्ते होत आहे. मंदिराच्या पायाभरणीचा दिवस एरवी आपण खूप धुमधडाक्यात साजरा केला असता पण करोनाचे गांभीर्य लक्षात घेता सर्वांनी वैयक्तिक पातळीवर उत्सव साजरा करावा, असं चंद्रकांत पाटील यांनी म्हटलं आहे.

मंदिराच्या पायाभरणी समारंभाचा दिवस म्हणजे घरात दिवाळी आहे, असे समजून खूप मोठ्या प्रमाणात साजरा करावा. आपल्या घरावर रोषणाई करावी, गुढी उभारावी, घरावर कंदील लावावा, घरासमोर पणत्या लावाव्यात आणि रांगोळी काढावी. घरामध्ये सर्व कुटुंबियांच्या सोबत टीव्हीवर भूमीपूजनाचा कार्यक्रम पाहावा. ५ ऑगस्टच्या समारंभाचा सामुहिक उत्सव टाळावा. सामुहिक उत्सव साजरा करणार असू तर त्यासाठी प्रशासनाची परवानगी घ्यावी. सामुहिक उत्सवामध्येसुद्धा करोनाचे भान ठेवावे. ढोलताशे आणि फटाके बिलकूल नकोत, असंही त्यांनी सांगितलं.

केंद्रीय गृहमंत्री व भाजपाचे माजी राष्ट्रीय अध्यक्ष अमित शाह करोना पॉझिटीव असल्याच्या बातमीमुळे मनामध्ये खूप चिंता निर्माण झाली. कोल्हापूरच्या अंबाबाईवर अमित शहा यांची श्रद्धा आहे. अमित शहा यांच्या तब्येतीला लवकर आराम मिळो व ते त्यांच्या कामाच्या नेहेमीच्या झपाट्याने पुन्हा कार्यरत होवोत, अशी प्रार्थनाही त्यांनी अंबाबाई चरणी केली.