पुणे: बापाने मुलीवर केले कटरने वार, भिंतीवर डोके आपटले

म. टा. प्रतिनिधी, : लॉकडाऊनमध्ये बेरोजगार झालेल्या एका व्यक्तीने दारू पिण्यास पैसे न दिल्यामुळे पोटच्या मुलीवर कटरने वार केल्याची धक्कादायक घटना भवानी पेठेत घडली. या प्रकरणी खडक पोलीस ठाण्यात गुन्हा दाखल करण्यात आला आहे.

याबाबत कासेवाडी परिसरातील एका २७ वर्षीय तरुणीने तक्रार दिली आहे. त्यानुसार तिच्या वडिलांवर गुन्हा दाखल करण्यात आला आहे. पोलिसांनी दिलेल्या माहितीनुसार, आरोपीने दोन दिवसांपूर्वी लहान मुलीकडे दारू पिण्यासाठी पैसे मागितले होते. मात्र, तिने पैसे न दिल्याने तो कटर घेऊन तिला मारण्यास धाऊन गेला. यावेळी तक्रारदार तरुणीने हस्तक्षेप केला. त्याने लहान मुलीला हाताने मारहाण केली. त्यानंतर त्याने दुसऱ्या मुलीवर कटरने वार करत तिचे डोके भिंतीवर आपटले. तक्ररादार तरुणी, तिची लहान बहीण आणि भाऊ असे तिघेही छोटी-मोठी कामे करतात. तर आरोपीही रोजंदारीवर काम करतो. परंतु, लॉकडाऊनच्या काळात त्याला काम मिळत नव्हते. सध्याही तो बेरोजगार आहे. मात्र दारूचे व्यसन असल्याने तो मुलांकडे सतत पैशांची मागणी करत असतो. या प्रकरणी खडक पोलीस अधिक तपास करत आहेत.