जळगाव जिल्ह्यात बाधितांची संख्या १२ हजारावर; ९ जणांचा मृत्यू

म. टा. प्रतिनिधी, जळगाव: जिल्ह्यात दिवसेंदिवस करोना बाधित रुग्णांची संख्या वाढत आहे. जिल्ह्यात सोमवारी २८३ नवीन कोरोना बाधित रुग्ण आढळले. त्यात सर्वाधिक ९५ बाधित रुग्ण हे एकट्या जळगाव शहरातील आहेत. दुसरीकडे, सोमवारी दिवसभरात ९ रुग्णांचा उपचारदरम्यान मृत्यू झाला आहे. जिल्ह्यातील करोना बाधितांची एकूण संख्या १२ हजार ३६ पर्यंत येवून ठेपली आहे.

जळगाव जिल्ह्यात करोना संसर्गाचा कहर सुरुच आहे. त्यात जिल्ह्यात सोमवारी नव्याने आढळलेल्या २८३ रुग्णांमध्ये जळगाव शहर ९५, जळगाव ग्रामीण ३३, भुसावळ ३, अमळनेर २४, चोपडा ३४, पाचोरा २, भडगाव ३, धरणगाव ४, यावल १३, एरंडोल २२, जामनेर २४, रावेर ६ पारोळा ५, चाळीसगाव १, मुक्ताईनगर १४ अश्या एकूण २८३ नव्या रुग्णांचा समावेश आहे. बोदवड तालुक्यात आज एकही रुग्ण आढळून आलेला नाही.

८ हजार ४६९ रुग्ण करोनामुक्त

सध्या जिल्ह्यात करोनाबाधितांची संख्या १२ हजार ३६ झाली आहे. त्यापैकी ८ हजार ४६९ रुग्ण करोनामुक्त होऊन घरी गेले आहेत. सध्या ३ हजार १८ करोनाबाधित रुग्णांवर उपचार सुरु आहेत. आज सोमवारी २६६ रुग्ण करोनामुक्त झाल्याने त्यांना डिस्चार्ज देण्यात आला आहे.

सोमवारी ९ रुग्णांचा मृत्यू

करोनामुळे सोमवारी दिवसभरात ९ करोना पॉझिटिव्ह रुग्णांचा उपचारादरम्यान मृत्यू झाला आहे. त्यात जळगाव तालुक्यात ३, जळगाव शहरातील २ तर एरंडोल, पारोळा, भडगाव व यावल तालुक्यातील प्रत्येकी एका रुग्णांचा समावेश आहे.