लिफ्ट देऊन महिलेवर बलात्कार, पुण्यात मुंढवात गुन्हा दाखल

म. टा. प्रतिनिधी, पुणे: फातिमानगर येथील पीएमपी स्थानकावर उभ्या असलेल्या महिलेला लिफ्ट देऊन तिला दुसऱ्याच ठिकाणी घेऊन जात तिच्यावर बलात्कार केल्याचा धक्कादायक प्रकार समोर आला आहे. याप्रकरणी मुंढवा पोलिस ठाण्यात गुन्हा दाखल करण्यात आला आहे.

याबाबत पिंपळे गुरव येथे राहणाऱ्या 45 वर्षीय महिलेने तक्रार दिली आहे. त्यानुसार राजेश कांबळे नावाच्या व्यक्तीवर गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार महिला ही घरकाम करते. रविवारी सकाळी ती फातिमानगर येथील पीएमपी स्थानकावर उभी होती. यावेळी राजेश कांबळे नाव सांगणाऱ्या व्यक्तीने त्यांना लोणीस सोडतो म्हणून लिफ्ट दिली. त्यानंतर जाताना ऑफीस दाखवितो म्हणून महिलेला कोरेगाव पार्क परिसरातील मॅरेज लॉन येथे घेऊन गेला. महिलेला अंगावरील सोन्याचे दागिने काढायला सांगून तिच्यावर बलात्कार केला. त्यानंतर महिलेचे एक लाख रुपयांचे दागिने घेऊन पसार झाला. त्यानंतर महिलीने मुंढवा पोलिसांकडे धाव घेऊन तक्रार दिली. याप्रकरणी उपनिरीक्षक एस. डी. नरके हे अधिक तपास करत आहेत.