चीनला उत्तर देण्यासाठी भारत सज्ज, डेपसांगमध्ये अत्याधुनिक रणगाडे तैनात

नवी दिल्लीः चीनच्या आक्रमकतेला सडतोड उत्तर देण्यासाठी भारताने दौलत बेग ओल्डि (डीबीओ) आणि डेपसांग सेक्टरमध्ये १५, ००० हून अधिक जवान तैनात केले आहेत. चिनी सैन्यावर लक्ष ठेवण्यासाठी अनेक सशस्त्र रेजिमेंट्स मैदानावर आणि आजूबाजूच्या भागातून हलवण्यात आल्या आहेत.

आर्मर्ड रेजिमेंट्स केके ते डेपसांगपर्यंत तैनात केल्या गेल्या आहेत. रणगाडे आणि इतर वाहनांच्या तैनातीसाठी भरपूर वाव आहे. डेपसांगच्या मैदानांवर संभाव्य लढाई क्षेत्रात जितक्या शस्त्रास्त्रांची तैनाती केली गेली आहे ती चिनी सैन्याचा कुठल्याही आगळीकीला प्रत्युत्तर देण्यासाठी सक्षम आहे, असं वृत्त इंडिया टुडेने दिलंय.

पीपी -10 मध्ये तैनात असलेल्या भारतीय जवानांती पीपी -13 मधील गस्त रोखण्यासाठी चिनी सैन्याने डीबीओ आणि डेपसांग परिसरात हळूहळू आपली स्थिती तैनात केली आहे. हा भाग गलवान खोऱ्याला लागून आहे आणि हा पूर्वे लडाख ते लेह जोडणार्‍या मुख्य मार्ग दारबुक-श्योक-दौलत बेग ओल्डी रस्त्याला जोडला गेला आहे.

लष्करप्रमुख जनरल मनोज मुकुंद नरवणे यांनीही याच भागात पाकिस्तान आणि चीनमधील संभाव्य संगनमताबाबत इशारा दिला होता. भारताने सध्या या भागात अतिरिक्त सैनिक तैनात केले आहेत. या वर्षी मेपासून एलएसीवर सुरू असलेल्या तणावाच्या पार्श्वभूमीवर पूर्व लद्दाखमध्ये ३५,००० अतिरिक्त जवान तैनात केले आहेत.

डेपसांग वाद दीर्घ काळापासून सुरू

चीनने उत्तर लडाखच्या डेपसांग-डीबीओ सेक्टरमध्ये नवीन आघाडी उघडण्याच्या मनसुबा आहे. डेपसांगचा वाद दीर्घ काळापासून सुरू आहे. लडाखमधील जूनच्या घटनेशी त्याचा काहीही संबंध नाही. परंतु ज्याप्रकारे घडामोडी समोर आल्या आहेत यामुळे हा मुद्दादेखील चर्चेच्या मध्यभागी आणणं आवश्यक झालं आहे.

चिनी वाहनांची हालचाल वाढली

डेपासांग येथील भारताला लागून असलेल्या सीमेवर चीनने आपल्या सैनिकांच्या तैनाती पूर्वीपेक्षा जास्त वाढवली आहे. चिनी वाहनांची हालचाल वाढली आहे. भारतीय सैनिक कायम त्यांना इथून पिटाळून लावत होते. पण यावर्षी चिनी सैनिकांची संख्या वाढवण्यात आली आहे. त्यांनी वाहनेही वाढली आहेत. चर्चेच्या शेवटच्या फेरीत भारताने डेपसांगचा मुद्दा उपस्थित केला होता. त्यावेळी भारतीय लष्कराची पेट्रोलिंग टीम आपल्या सीमेत घुसल्याचा आरोप चीनने केला होता.