संजय शिरसाटांची लेकीबाळींकडे बघण्याची दृष्टी गलिच्छ आणि विकृत; सुषमा अंधारेंचा पलटवार
संजय शिरसाट नेमकं काय म्हणाले होते?
संजय शिरसाट यांनी छत्रपती संभाजीनगर येथील शिवसेना मेळाव्यात बोलताना सुषमा अंधारे यांच्यावर जोरदार टीका केली होती. मात्र, यावेळी संजय शिरसाट यांची जीभ घसरली होती. त्यांनी म्हटले होते की, ‘ती बाई म्हणते सगळेच माझे भाऊ आहेत. सत्तार भाऊ माझेच भाऊ आहेत, भुमरे भाऊ पण माझेच भाऊ आहेत. पण त्या बाईने काय-काय लफडी केली आहेत, तिलाच माहीत…’, असे संजय शिरसाट यांनी म्हटले होते.
सुषमा अंधारेंचा पलटवार
संजय शिरसाट यांच्या या वक्तव्यानंतर सुषमा अंधारे यांनी फेसबुक पोस्टच्या माध्यमातून प्रत्युत्तर दिले आहे. संजय शिरसाटांनी माझ्याबद्दल काहीतरी सवंग सुमार शाब्दिक टिप्पणी केल्याचे माध्यमांकडून समजले. इतरांच्या लेकीबाळीकडे, आई किंवा बहिणीच्या नात्याने बघण्यासाठी अंगी शील पारमिता असावी लागते. सत्ता आणि संपत्तीची धुंदी आलेल्या शिरसाट सारख्या लोकांकडे अशी शील पारमिता असण्याची सुतराम शक्यता नाही. उलटपक्षी शिरसाटच्या बोलण्यातून महाराष्ट्रातील लेकिबाळीकडे बघण्याची त्यांची दृष्टी किती गलिच्छ आणि विकृतीने बरबटलेली आहे याचाच त्यांनी पुरावा दिला, असे सुषमा अंधारे यांनी म्हटले.
