विमानात मधाचे ‘सॅशे’ अन् खादीची ‘डेनिम’

म. टा. प्रतिनिधी, पुणे: देशात मध उत्पादकांना प्रोत्साहन देण्यासाठी ‘हनी क्लस्टर’ तयार करण्यात येणार आहे. त्यामध्ये साखरेच्या पाकिटाप्रमाणे मधाचे ‘सॅशे’ तयार केले जातील. याशिवाय मधाचे क्यूब तयार करण्याबाबतही संशोधन सुरू आहे. त्यामुळे विमाने, पंचतारांकित हॉटेल्समध्ये चहा-कॉफीत मिसळण्यासाठी साखर आणि मधाचाही पर्याय उपलब्ध राहील. यासाठी विविध विमान कंपन्यांशी चर्चा करणार आहे, अशी माहिती केंद्रीय सूक्ष्म, लघू व मध्यम उद्योग मंत्री यांनी दिली. याशिवाय ‘खादी डेनिम’ लोकप्रिय होत असून, महात्मा गांधीजींच्या १५० व्या जयंती वर्षानिमित्त अभिनेते-अभिनेत्रींच्या मदतीने त्याचा प्रसार करण्याचा मानस आहे, असेही त्यांनी सांगितले.

पुण्यातील केंद्रीय मधमाशी संशोधन व प्रशिक्षण संस्थेला सोमवारी नितीन गडकरी यांनी भेट दिली. त्यानंतर पत्रकारांशी बोलताना ‘एमएसएमई’ आणि ‘खादी-ग्रामोद्योग’ विभागांतर्फे भविष्यात राबविण्यात येणाऱ्या उपक्रमांची, योजनांची माहिती दिली. ‘हनी क्लस्टर’चा निधी दहा पटीने वाढविण्यात येणार आहे, तसेच विविध उद्योजकांनाही या ‘क्लस्टर’च्या निर्मितीसाठी प्रोत्साहित केले जाणार आहे, असे गडकरी यांनी सांगितले.

विपणनासाठी ‘पोर्टल’; ‘पोस्ट’ करणार ‘डिलिव्हरी’

सरकारी संस्थांनी केलेले संशोधन सर्वसामान्यांना पाहता यावे, तसेच या संशोधनाच्या आधारे उत्पादनाची निर्मिती करता यावी, यासाठी ‘एमएसएमई’ विभागातर्फे विशेष पोर्टल तयार केले जात आहे, तसेच उत्पादनाच्या विपणनासाठीही चीनच्या ‘अलिबाबा’ कंपनीसारखे ‘मार्केटिंग पोर्टल’ तयार केले जात असून, उत्पादन ग्राहकांपर्यंत पोहोचविण्यासाठी टपाल विभागाशी चर्चा सुरू आहे. त्यामुळे पुण्यातील व्यक्तीला थेट अरुणाचल प्रदेशमधील उत्पादन घरबसल्या खरेदी करता येईल, पर्यायाने शेतकरी-आदिवासी-ग्रामीण भागातील युवकांना रोजगार मिळेल, अशी माहितीही गडकरींनी दिली.