सुशांतच्या एक्स मॅनेजरची बलात्कार करून हत्या, नारायण राणेंचा गंभीर आरोप

मुंबईः सुशांत सिंह राजपुतची एक्स मॅनेजर दिशा सालियानच्या आत्महत्येची चौकशी का केली नाही? दिशावर बलात्कार करून तिची हत्या झाल्याचा, गंभीर आरोप भाजप नेते यांनी सरकारवर केला आहे. सुशांत सिंह राजपूत आत्महत्याप्रकरणाला आता राजकीय रंग चढू लागला आहे. राजकीय दबावामुळं मुंबई पोलिस चौकशी करू शकत नाहीत, असा आरोप सातत्यानं भाजपकडून होत असताना नारायण राणे यांनीही आज एक पत्रकार परिषद घेऊन सरकारवर निशाणा साधला आहे. सुशांतसिंह राजपूत प्रकरणाची चौकशी ज्या दिशेनं सुरु आहे त्यातून कोणाला तरी वाचवायचं आहे. असा आरोपही त्यांनी केला आहे.

दिशा सलियान ही सुशांतची एक्स मॅनेजर होती. तिने आत्महत्या केल्यानंतर दोन दिवसांनी तिचे पोस्टमार्टम करण्यात आलं. तिच्या आत्महत्येचा तपास का झाला नाही. तिने आत्महत्या केली नसून तिचीही हत्याच करण्यात आली आहे. तिच्यावर बलात्कार करून ठार मारण्यात आले आहे. तिच्या गुप्तांगावर जखमा असल्याचा, खळबळजनक खुलासाही त्यांनी केला आहे. तसंच, दिशा सलियानचा पोस्टमार्टमचा अहवालही माझ्याकडे असल्याचा दावा त्यांनी यावेळी केला आहे.

गुन्हेगारांना वाचवण्याचा राज्य सरकारकडून प्रयत्न होत आहे. पण विरोधी पक्ष सक्षम आहे आम्ही चुकीचं घडू देणार नाही. दिनो मारियोच्या घरी रोज पार्टी होते. त्या पार्टीलाही अनेक मंत्री हजर असतात. त्यादिवशीही पार्टी होती. त्या मंत्र्यांपैकी एक मंत्री सुशांतच्या आत्महत्येआधी त्याच्या घरी गेला होता. त्याची चौकशी अधिकाऱ्यांनी करावी, असंही त्यांनी म्हटलं आहे.

शिवसेनेत नवे कलेक्टर ऑफिसर

दरम्यान, अमृता फडणवीस यांनी सुशांतसिंह राजपूतप्रकरणी केलेल्या ट्विटवरून रंगलेल्या वादावरही नारायण राणे यांनी भाष्य केलं आहे. युवासेनेचे सरचिटणीस वरुण सरदेसाई यांनी अमृत फडणवीस यांच्यावर केलेल्या टीकेचा त्यांनी समाचार घेतला आहे. तू अजून लहान आहेस, तोंड बंद करण्याचा उपाय आमच्याकडे आहे. त्यामुळं तोंड सांभाळून बोल. शिवसेनेत आता नवे कलेक्टर ऑफिसर आले आहेत. त्यांच्या कुंडल्या आम्हाला माहिती आहेत. ते कुठे जातात, काय करतात, कुणाशी बोलतात, ते सर्व आम्हाला माहिती आहे. त्यामुळे त्यांनी तोंड बंद करावं. असा इशारा त्यांनी दिला आहे