पुणे : मुख्यमंत्री एकनाथ शिंदे यांच्या नेतृत्वाखालील शिवसेनेचे प्रवक्ते आणि ठाण्याचे माजी महापौर नरेश म्हस्के यांनी राष्ट्रवादीचे नेते आणि विधानसभेचे विरोधी पक्षनेते अजित पवार यांच्यावर गंभीर आरोप केले आहेत. महाराष्ट्र क्रिकेट असोसिएशनच्या निवडणुकीत अध्यक्षपदाच्या स्पर्धेत उतरलेले राष्ट्रवादीचे आमदार रोहित पवार यांच्याविरोधात अजित पवार यांनीच षडयंत्र रचल्याचा आरोप त्यांनी केला आहे. ‘पवार कुटुंबातील कोणती व्यक्ती रोहित पवार यांना पाडा म्हणून सगळ्यांना निरोप देत होती? अजित पवार साहेब, आधी आपलं घरातलं बघा आणि नंतर मुख्यमंत्र्यांवर टीका करा,’ असं वक्तव्य म्हस्के यांनी केलं. म्हस्के यांच्या आरोपांना आता अजित पवार यांनी त्यांच्या खास शैलीत उत्तर दिले आहे. ‘कोण नरेश म्हस्के? त्यांना मी ओळखत नाही. असल्या आलतू-फालतू स्टेटमेंट करणाऱ्यांना मी महत्त्व देत नाही. आम्ही कधीच घरामध्ये असं वागत नाही. संपूर्ण महाराष्ट्राला माहीत आहे अजित पवारांची भूमिका जी असते तीच कायम असते. त्यामुळे माझ्याकडून असं काही घडणं शक्यच नाही. रोहित पवार माझ्या कुटुंबातील एक घटक आहे, तो माझा पुतण्या आहे. त्यामुळे तो मला माझ्या मुलासारखा आहे,’ असं यावेळी अजित पवार म्हणाले. संयोगिताराजेंना मंदिरात वेदोक्त मंत्र म्हणण्यास विरोध, आव्हाड संतापले, म्हणाले, सनातनी मनुवाद्यांचा माजोरडेपणा!
दरम्यान, अजित पवार यांच्या या वक्तव्यावर आता शिंदेंच्या शिवसेनेकडून काय प्रतिक्रिया दिली जाते, हे पाहणं महत्त्वाचं ठरणार आहे.
संभाजीनगरमधील घटनेवरही दिली प्रतिक्रिया
छत्रपती संभाजीनगर येथे काल रामनवमीच्या दिवशी दोन गटात हाणामारी झाल्याची घटना घडल्यानंतर आज पुन्हा छत्रपती संभाजीनगरात दोन गट आमने-सामने आल्याची घटना घडली आहे. यावर देखील अजित पवार यांनी प्रतिक्रिया दिली असून ते म्हणाले की, ‘मी काल नाशिक दौऱ्यावर होतो. काल माहिती घेतली आणि तिथल्या जनतेला आवाहन केलं आहे की अशा प्रमाणे दंगल कोणी घडवून आणण्याच्या प्रयत्न करत असेल तर त्याला कोणीही खतपाणी घालू नये. शांतता ठेवली पाहिजे. तसंच कुठल्याही अफवांवर विश्वास ठेवता कामा नये. अतिशय दुर्दैवी घटना ही घडली आहे. जरी मी विरोधी पक्षात असलो तरी कुठल्या ही प्रकारचे वक्तव्य होऊ देणार नाही की ज्याने वातावरण बिघडेल. सगळ्यांनी शांतता प्रस्थापित करायला हवी. मी पुन्हा तमाम बांधवांना आवाहन करेल की कृपया माथी भडकून देण्याचे काम केलं तर त्याला कोणी ही बळी पडू नका.’
संयोगिताराजेंना मंदिरात वेदोक्त मंत्र म्हणण्यास विरोध, आव्हाड संतापले, म्हणाले, सनातनी मनुवाद्यांचा माजोरडेपणा!
