भयानक! तरुणाला घराबाहेर फरफटत आणलं, मारहाणीनंतर मूत्र पाजलं

ओडिशा: ओडिशात मानवतेला काळिमा फासणारी घटना घडली आहे. एका तरुणाला काही जणांनी घराबाहेर फरफटत आणून त्याला बेदम मारहाण केली. तरुणीने जेव्हा पाणी मागितले तेव्हा त्याला पिण्यासाठी मूत्र देण्यात आले. भद्रक जिल्ह्यातील तिहिडी पोलीस ठाण्याच्या हद्दीतील बाउंसगावात रविवारी रात्री ही अमानवी घटना घडली. या प्रकरणी पोलिसांनी अद्याप कुणालाही अटक केली नाही.

या घटनेचा व्हिडिओ सोशल मीडियावर व्हायरल झाला आहे. त्यानंतर भद्रक जिल्हाधिकाऱ्यांनी घटनेच्या चौकशीचे आदेश दिले आहेत. पीडित तरूणाला एका प्रकरणात तुरुंगात जावे लागले होते. तीन दिवसांपूर्वीच तो गावात परतला होता. गावातील काही तरुणांशी त्याचे आधीच वाद झाले होते. रविवारी रात्री सातहून अधिक तरुण त्याच्या घरी आले. त्याला फरफटत बाहेर काढले. त्याच्या तोंडावर चुना फासल्यानंतर चपलांचा हार घालून त्याची गावभरात धिंड काढली. त्यानंतर त्याचे मुंडण करून मारहाण केली. हे सगळं गावातील शेकडो ग्रामस्थांसमोर घडले. मात्र, त्याच्या बचावासाठी कुणीच पुढे आले नाही.

या घटनेनंतर पीडित तरुणाच्या पत्नीने पोलीस ठाण्यात तक्रार दाखल केली होती. मात्र, त्यावेळी पोलिसांनी कोणतीही कारवाई केली नाही. या घटनेचा व्हिडिओ सोशल मीडियावर व्हायरल झाल्यानंतर जिल्हाधिकाऱ्यांनी या घटनेच्या चौकशीचे आदेश दिले आहेत. अद्याप या प्रकरणात कोणालाही अटक झालेली नाही.