पतीच्या मृत्यूनंतर महिलेचे दिरासोबत लग्न लावले; सासूने वेश्याव्यवसायात ढकलले

नवी : दोन महिन्यांपूर्वीच महिलेच्या पतीने आत्महत्या केली होती. त्यानंतर सासू-सासऱ्यांनी जबरदस्ती तिचे लग्न दिरासोबत लावून दिले. त्या दिराने आणि सासूने तिला वेश्याव्यवसायात ढकलले. पूर्व दिल्लीतील फर्श बाजार परिसरात हा धक्कादायक प्रकार घडला आहे.

दोन-सव्वादोन महिन्यांपूर्वी या महिलेच्या पतीने आत्महत्या केली होती. त्याच्या मृत्यूनंतर सासू-सासऱ्यांनी जबरदस्तीने तिचे लग्न दिरासोबत लावून दिले. हे दुसरे लग्नच तिच्यासाठी नरकासमान झाले होते. तिच्या दुसऱ्या पतीने आणि सासूने तिला वेशाव्यवसायात ढकलले. अश्लिल व्हिडिओ काढून तिला ब्लॅकमेल केले. तिने विरोध केला असता, तिला बेदम मारहाण केली. इतकेच नाही तर पतीच्या मित्रांनी तिच्यावर सामूहिक बलात्कारही केला, असा आरोप या महिलेने केला आहे. अखेर या महिलेने पोलिसांकडे धाव घेतली.

डिसेंबर २०१४ मध्ये महिलेचे लग्न श्रीराम कॉलनीतील एका व्यक्तीशी झाले होते. त्यांचा संसार सुखाचा सुरू होता. तिच्या पतीचे त्याच्या आई-वडिलांशी नेहमी वाद होत होते. अखेर या भांडणाला कंटाळून त्याने गळफास घेऊन आत्महत्या केली. त्यानंतर सासू-सासऱ्यांनी जबरदस्ती तिचे लग्न दिरासोबत लावून दिले. लग्नानंतर पुढील महिन्यातच ती गरोदर राहिली. सासरच्यांनी रसात कोणतेतरी औषध मिसळून तिला प्यायला दिले. त्यामुळे तिचा गर्भपात झाला. धक्कादायक म्हणजे दुसऱ्या पतीने आणि सासूने तिला वेशाव्यवसाय करण्यास भाग पाडले. अनोळखी व्यक्तींना घरी बोलावून त्यांच्यासोबत शारीरिक संबंध ठेवण्यास सांगितले. विरोध केला असता तिला बेदम मारहाण करण्यात येत होती. त्यानंतर तिचा अश्लिल व्हिडिओ काढून तिला ब्लॅकमेल केले.

पोलिसांच्या माहितीनुसार, एप्रिल २०२० मध्ये पती तिला घेऊन दिल्लीबाहेर गेला. रस्त्यात त्यांच्या कारला अपघात झाला. त्यानंतर तिला घेऊन तो आपल्या मित्राच्या घरी गेला. तिथे तिला जबरदस्ती दारू पाजली. त्यानंतर त्याच्या पाच मित्रांनी सामूहिक बलात्कार केला, असा आरोप महिलेने केला आहे. महिलेवर बलात्कार करणाऱ्या पाच जणांविरोधात कारवाई केली जाईल, असे पोलिसांनी सांगितले. पीडित महिलेने फर्श बाजार पोलीस ठाण्यात तक्रार दाखल केली आहे. पोलिसांनी पीडित महिलेच्या जबाबाच्या आधारे गुन्हा दाखल केला आहे. या प्रकरणाची पोलीस चौकशी करत आहेत.