करोनानंतर एकाचवेळी इंग्लंडचे दोन संघ खेळत आहेत क्रिकेट मालिका

करोनानंतर क्रिकेट हे सर्वात जलद होणार आहे, असे म्हटले जात आहे. या गोष्टीची सुरुवात इंग्लंडने सुरु केल्याचे पाहायला मिळते आहे. कारण एकाच वेळी इंग्लंडचे दोन संघ क्रिकेट मालिका खेळताना पाहायला मिळत आहेत.

करोनानंतर कमी दिवसांमध्ये क्रिकेटचे जास्त सामने खेळवण्यात येणार आहेत. कारण गेले पाच महिने क्रिकेट करोनामुळे ठप्प झाले होते. हे सर्व नुकसान लवकर भरून काढायचे असेल तर कमी दिवसांमध्ये जास्तीत जास्त सामने यापुढे खेळवण्यात येणार आहे. त्यासाठी इंग्लंडने चांगलीच कंबर कसली असल्याचे पाहायला मिळत आहे.

करोनानंतर कमीत कमी दिवसांत जास्त क्रिकेट खेळण्यासाठी इंग्लंडने आपले दोन संघ बनवले आहेत. इंग्लंडचा एक संघ सध्याच्या घडीला पाकिस्तानबरोबर कसोटी मालिका खेळत आहे. आजपासून ही कसोटी मालिका सुरु झाली आहे. पहिल्या कसोटी सामन्यात पाकिस्तानचा संघ प्रथम फलंदाजी करताना दिसत आहे.

इंग्लंडचा संघ एकिकडे कसोटी मालिकेमध्ये व्यस्त होता. पण दुसरीकडे इंग्लंडचा दुसरा संघ हा एकदिवसीय सामना खेळण्यात मग्न होता. आयसीसीच्या क्रिकेट सुपर लीग स्पर्धेमध्ये इंग्लंड आणि आयर्लंड यांच्यामध्ये तीन एकदिवसीय क्रिकेट सामने खेळवले गेले आहेत. या तीन सामन्यांमध्ये इंग्लंडने २-१ अशी मजल मारली आहे. पहिल्या दोन सामन्यात इंग्लंडने विजय मिळवला असला तरी तिसऱ्या सामन्यात आयर्लंडने इंग्लंडवर मात केली होती.

कसोटी मालिकेसाठी इंग्लंडचे कर्णधारपद जो रूटकडे सोपवण्यात आले आहे, तर एकदिवसीय संघाचे कर्णधारपद इऑन मॉर्गनकडे आहे. इंग्लंडच्या एकदिवसीय संघात मॉर्गनसह मोईन अली, जेसन रॉय, जॉनी बेअरस्टो, सॅम बिलींग्स, आदिल रशिद, टॉम कुरन या खेळाडूंचा सामवेश होता. दुसरीकडे कसोटी संघात रूटसह बेन स्टोक्स, जोस बटलर, जोफ्रा आर्चर, जेम्स अँडरसन, स्टुअर्ट ब्रॉड, ख्रिस वोक्स यांचा समावेश आहे.

करोना सुरु झाल्यावर इंग्लंडमध्येही क्रिकेट ठप्प पडले होते. पण त्याचवेळी आपल्याला काही दिवसांनी एकाच वेळी दोन संघ तयार करावे लागतील, असे त्यांना समजले होते. त्यामुळे त्यांनी काही दिवसांपूर्वीच आपले दोन वेगवेगळे संघ बनवायचे, याची प्लॅनिंग सुरु केली होती.