लखनौ : उत्तर प्रदेशातील रायबरेली येथील तरुणाच्या हत्याकांडाचे गूढ उलगडत पोलिसांनी आरोपीला अटक केली आहे. आरोपीने खुनासाठी वापरलेले पिस्तूलही जप्त करण्यात आले आहे. मित्राला आपल्या पत्नीशी शारीरिक संबंध ठेवण्याची इच्छा असल्याच्या संशयातून पतीने टोकाचं पाऊल उचलल्याचा आरोप आहे.पाच एप्रिल रोजी पोलिसांना एका तरुणाचा मृतदेह सापडला होता. पोलिसांनी गुन्हा दाखल करून तपास सुरू केला. पोलिसांचा तपास जसजसा पुढे जात होता, तसतशा धक्कादायक बाबी समोर येत होत्या. मृतदेहाची ओळख पटवण्यासाठी पोलिसांनी ठिकठिकाणी मृताचे फोटो लावले होते. त्या आधारे मयत तरुण हा सागर राणा असल्याचे समोर आले. तो कर्नालचा रहिवासी होता.लखनौमध्ये राहत असताना तो विजय सिंह याच्यासोबत प्रॉपर्टी डीलिंगचे काम करायचा. दरम्यानच्या काळात विजय सिंह सोबत सागरची चांगली गट्ट जमली. दोघेही एकमेकांच्या घरी जाऊ लागले. मात्र सागरला संधीचा फायदा घेऊन आपल्या पत्नीशी शारीरिक संबंध ठेवायचे असल्याचा संशय विजयला पोखरु लागला.संशयाने बेजार झालेल्या विजयने आपल्या साथीदारासह एक प्लॅन आखला. आपल्या सफारी कारमधून तो शिवगड परिसरात गेला. तिथे त्याने सागरची गोळ्या झाडून हत्या केली आणि घटनास्थळावरून पळ काढला. पोलीस अधीक्षक आलोक प्रियदर्शी यांनी सांगितले की, मृत सागर राणा याचे नातेवाईक त्याला शोधण्यासाठी लखनौला आले होते. बिजनौर पोलीस स्टेशन परिसरात त्यांना सागरचा फोटो चिकटवलेलं एक पोस्टर दिसलं. त्यावर त्यांना पोलिसांचा नंबर मिळाला. त्यांनी शिवगढ पोलिस स्टेशनशी संपर्क साधला आणि आमच्या मुलाचे वर्णन फोटोतील सारखेच असल्याचे सांगितले. मृतदेहाची ओळख पटली आणि पोलिसांनी वेगाने तपास सुरु करत आरोपींपर्यंत पोहोचले. यानंतर आरोपी विजय सिंहला अटक करण्यात आली. आरोपींकडून हत्येसाठी वापरण्यात आलेले पिस्तूलही जप्त करण्यात आले आहे.
