अयोध्येत राम मंदिराच्या भूमिपूजनाच्या कार्यक्रमानंतर मुख्यमंत्री उद्धव ठाकरेदेखील अयोध्येला जाणार असून, शिवसेना तेथे थाटामाटात कार्यक्रम घेणार असल्याचे शिवसेना खासदार संजय राऊत यांनी बुधवारी सांगितले. त्याचवेळी घुमट काढण्यात शिवसैनिकांचा मोठा वाटा असल्याचे सांगताना, कुणीही याचे श्रेय घेऊ नये, असेही त्यांनी म्हटले.
अयोध्येत होत असलेल्या राम मंदिर भूमिपूजनाच्या पार्श्वभूमीवर शिवसेनेचे नेते खासदार संजय राऊत यांनी आनंद व्यक्त केला. याविषयी अधिक माहिती देताना संजय राऊत म्हणाले, ‘राम मंदिराचे भूमिपूजन पंतप्रधान नरेंद्र मोदी यांच्या हस्ते होत आहे, ही आनंदाची गोष्ट आहे. हा सरकारी कार्यक्रम असून, आजचा मुहूर्त महत्त्वाचा आहे. साधुसंतांनी सांगितल्याप्रमाणे आजच्या मुहूर्तावर भूमिपूजन होत आहे. आजच्या कार्यक्रमाचे श्रेय कोणीही घेऊ नये. कारण हा सरकारी कार्यक्रम आहे. बाळासाहेबांना आणि शिवसेनेला कोणी विसरू शकत नाही. राम मंदिर उभारणीतील त्यांचे योगदान मोठे आहे. अनेकांचे यात योगदान आहे. घुमट काढताना शिवसैनिकांचे मोठे योगदानआहे.’
या कार्यक्रमानंतर अयोध्येत जाणार आहेत. आम्ही अयोध्येत राम जन्मभूमीत थाटामाटात कार्यक्रम करणार आहोत. करोनाचा प्रादुर्भाव कमी झाल्यानंतर शिवसेनेच्या वतीने तिथे कार्यक्रम करणार आहे. आजच्या कार्यक्रमाला लालकृष्ण अडवाणी आणि मुरली मनोहर जोशी वयोमानामुळे उपस्थित राहू शकले नाहीत, असेही संजय राऊत यांनी नमूद केले.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
