मुंबई :आयटी (तंत्रज्ञान) क्षेत्रातील शेअर्सची जोरदार विक्री झाल्यामुळे सोमवारी देशातील शेअर बाजार कोसळले. सेन्सेक्स ५२०.२५ अंक म्हणजेच ०.८६ टक्के घसरून ५९,९१०.७५ अंकांवर तर निफ्टी १२५.६५ अंक म्हणजेच ०.७% घसरून १७,७०२.३५ अंकांच्या पातळीवर बंद झाला. देशातील दुसरी मोठी आयटी कंपनी इन्फोसिसचे शेअर्स निफ्टीवर सर्वाधिक ९.३७ टक्क्यांनी घसरून बंद झाला.

शेअर बाजाराची वाटचाल
सेन्सेक्स, निफ्टी सकाळी मोठ्या घसरणीनेच उघडले. सेन्सेक्सची घसरण तब्बल ९५० अंकांच्या पुढे गेली होती. तर निफ्टीही २२५ हून अधिक अंकांनी कोसळला होता. त्यानंतर बाजारातील घसरण थांबली. दिवसाअखेरपर्यंत सेन्सेक्स, निफ्टीत सुधारणा झाली.अमेरिकेत तिमाही निकालांचा हंगाम सुरू झाला आहे. दुसरीकडे चीनशी संबंधित अनेक डेटा येत आहेत. यावरून जगातील दुसऱ्या क्रमांकाची अर्थव्यवस्था कशी कामगिरी करत आहे हे दिसून येईल. अशा स्थितीत आशियाई शेअर बाजारातील गुंतवणूकदारांनी सावध दृष्टिकोन स्वीकारला.

इन्फोसिसच्या शेअरला झालंय काय? LICसह मूर्ती कुटुंबाने गमावले हजार कोटी रुपये
मिडकॅप निर्देशांक वधारून बंद
क्षेत्रीय निर्देशांकांत माहिती तंत्रज्ञान निर्देशांक ४.७ टक्क्यांनी घसरला. त्याच वेळी फार्मा निर्देशांकात ०.५% घसरण झाली. पीएसयू बँक निर्देशांकात तीन टक्के आणि तेल आणि वायू आणि एफएमसीजी निर्देशांकात प्रत्येकी एक टक्का वाढ झाली. बीएसई मिडकॅप निर्देशांक ०.५ टक्क्यांनी वधारून बंद झाला. तर स्मॉलकॅप निर्देशांक देखील ०.१५ टक्क्यांच्या वाढीसह बंद झाला.

एका घोषणेननंतर गुंतवणूकदार सोडतायत कंपनीची साथ, धाडकन कोसळला स्टॉक; बाजारात खळबळ!
हे शेअर्स कोसळले
सेन्सेक्सवर इन्फोसिसच्या शेअर्समध्ये सर्वात मोठी घसरण पाहायला मिळाली. हा शेअर ९.४० टक्क्यांनी घसरला. त्याचप्रमाणे टेक महिंद्रामध्ये ५.२५ टक्के, एचसीएल टेकमध्ये २.७२ टक्के, एनटीपीसीमध्ये २.०२ टक्के, लार्सन अँड टुब्रोमध्ये १.९८ टक्के, विप्रोमध्ये १.८१ टक्के, एचडीएफसीमध्ये १.६१ टक्के, टीसीएसमध्ये १.५८ टक्के, एचडीएफसी बँक आणि एअरटीमध्ये १.५५ टक्के आणि ०.८३ टक्क्यांची घसरण झाली.

या शेअर्समध्ये तेजी
सेन्सेक्समध्ये नेस्ले इंडियाचा सर्वाधिक ४.०३ टक्के वाढ झाला. त्याचप्रमाणे पॉवर ग्रिड २.२९ टक्के, एसबीआय २.०४ टक्के, कोटक महिंद्रा बँक १.४५ टक्के, इंडसइंड बँक १.३७ टक्के, अल्ट्राटेक सिमेंट १.२६ टक्के आणि आयटीसी १.२० टक्क्यांनी वाढले. आयटीसीचा शेअर ४०० रुपयांवर बंद झाला. याशिवाय एशियन पेंट्स, बजाज फायनान्स, टायटन, महिंद्रा अँड महिंद्रा, हिंदुस्तान युनिलिव्हर लिमिटेड आणि टाटा मोटर्सचे शेअर्सही तेजीत बंद झाले.

LEAVE A REPLY

Please enter your comment!
Please enter your name here