चेन्नई : आयआयटी मद्रासमधील बीटेकच्या एका २० वर्षीय विद्यार्थ्याने आत्महत्या केली आहे. विद्यार्थ्याने आपल्या हॉस्टेलच्या रूममध्ये त्यांनी आत्महत्या केली. शुक्रवारी ही घटना घडली. गेल्या अडीच महिन्यातील आयआयटी मद्रासमधील ही चौथ्या विद्यार्थ्याची आत्महत्या आहे. हा विद्यार्थी महाराष्ट्राचा आहे. आत्महत्येपूर्वी त्याने आपले आई-वडील आणि मित्रांच्या नावे चिठ्ठी लिहिली आहे. आपल्या आत्महत्येला कुणालाही जबाबदार धरू नये, असं त्याने चिठ्ठीत म्हटलं आहे. आणि माफी मागितली आहे. केदार सुरेश असं आत्महत्या केलेल्या विद्यार्थ्याचं नाव आहे.आयआयटी मद्रासमध्ये केदार सुरेश हा दुसऱ्या वर्षातील विद्यार्थी होता. त्याच्या आत्महत्येप्रकरणी पोलिसांनी प्राथमिक चौकशी केली आहे. रिलेशनशिप तुटल्यामुळे केदार सुरेश याने आत्महत्या केल्याचा पोलिसांचा अंदाज आहे. विद्यार्थ्याच्या आत्महत्येनंतर आयआयटी मद्रासने पत्रक जारी केलं आहे. तणावाखाली असलेल्या विद्यार्थ्यांना शोधणं आणि त्यांना मदत करण्यासाठी आवश्यक ती सर्व पावलं उचलण्यात येत आहेत. आम्ही या दृष्टीने ठोस उपाययोजना करत आहोत, असं आयआयटी मद्रासने म्हटलं आहे. यापूर्वी ३१ मार्चला सचिन कुमार जैन (वय ३१) या विद्यार्थ्याने आपल्या वेलाचेरी येथील निवासस्थानी आत्महत्या केली होती. त्याच्या दोन आठवड्यांपूर्वी म्हणजे १४ मार्चला आंध्र प्रदेशचा बीटेकचा विद्यार्थी व्ही. वैपू पुष्पक श्री साई (वय २० ) याने आत्महत्या केली होती. त्यापूर्वी फेब्रुवारी १४ला एमएस करत असलेल्या महाराष्ट्रातल्या स्टीफन सनी याने आपल्या रूमवर आत्महत्या केली होती. तर आत्महत्येचा प्रयत्न करणाऱ्या आणखी एका विद्यार्थ्याला चिंताजनक स्थितीक हॉस्पिटलमध्ये दाखल करण्यात आलं होतं. वर्गात आला नाही, मित्र रूमवर गेले अन् धक्काच बसलाकेदार हा शुक्रवारी सकाळी वर्गात आलाच नाही. त्याच्या वर्ग मित्रांनी दुपारी त्याच्या रूमवर गेले. पण रूम आतून बंद होती. दार ठोठावूनही आतून कुठलाही प्रतिसाद त्यांना मिळत नव्हता. यानंतर त्यांनी प्रशासनाला माहिती दिली. कर्मचाऱ्यांनी अखेर दारवाजा तोडला आणि रूममध्ये प्रवेश केला. त्यावेळी सर्वांना धक्काच बसला. केदाने सिलिंगला लटकून गळफास घेऊन आत्महत्या केल्याचे समोर आले. केदार काही दिवसांपासून तणावात होता, असं त्याच्या मित्रांनी सांगितलं.
