पुणे :पुण्याचे भाजप खासदार गिरीश बापट यांच्या निधनानंतर पुणे लोकसभेची जागा रिक्त झाली आहे. यामुळे पुणे लोकसभा पोटनिवडणूक लवकरच जाहीर होण्याची शक्यता आहे. ही पोटनिवडणूक लढवण्यासाठी भाजपसह काँग्रेस आणि राष्ट्रवादीच्या नेत्यांनी तयारी सुरु केल्याचं चित्र सध्या पुण्यात पाहायला मिळत आहे. भाजपचे शहराध्यक्ष जगदीश मुळीक यांचे कल्याणीनगर भागात भावी खासदार म्हणून बॅनर लागले होते. तर राष्ट्रवादीचे शहराध्यक्ष प्रशांत जगताप यांचे देखील राष्ट्रवादी भवनसमोरच भावी खासदार म्हणून बॅनर लागले होते. इतकंच काय तर अजित पवार यांनी देखील जगतापांना खासदारकीसाठी शुभेच्छा दिल्या आहेत.दुसरीकडे, भाजपमध्ये देखील इच्छुकांची मोठी यादी आहे. शहराध्यक्ष जगदीश मुळीक यांच्यासह माजी महापौर मुरलीधर मोहोळ, माजी खासदार संजय काकडे, गिरीश बापट यांच्या स्नुषा स्वरदा बापट यांचं नाव देखील चर्चेत आहे. या पार्श्वभूमीवर भाजप नेत्या आणि कोथरूड विधानसभा मतदारसंघाच्या माजी आमदार मेधा कुलकर्णी यांनी महाराष्ट्र टाइम्स ऑनलाईनशी बोलताना पुणे लोकसभा पोटनिवडणुकीसंदर्भात आपली प्रतिक्रिया दिली आहे. पक्षाने संधी दिली तर मी पुणे लोकसभा लढवण्यासाठी तयार असल्याचं त्यांनी म्हटलं आहे.

आतापर्यंत पक्षाने जी जबाबदारी मला दिली, ती मी पार पाडली आहे. आधी लोकप्रतिनिधी म्हणून आणि नंतर पक्ष संघटनेतून जनतेचे कामं केली आहेत. आता पक्षाने काही जबाबदारी दिली, तर ती देखील मी पार पाडण्याचा प्रयत्न करेन. लोकसभेसाठी माझं नाव चर्चेत आहे. हे खरं आहे. पक्षाने संधी दिली तर मी निश्चितच पुणे लोकसभा लढवण्यासाठी तयार आहे. विधानसभा निवडणुकीत पक्षाचा आदेश पाळला आणि आताही पक्षाने लढण्याचे सांगितले, तर तो आदेश मानून नक्कीच पोटनिवडणूक लढवेन, असं मेधा कुलकर्णी म्हणाल्या आहेत.

दुसरीकडे भाजपातून मुळीक, मोहोळ, माजी खासदार संजय काकडे यांचीही लोकसभा लढवण्याची इच्छा काही लपून राहिलेली नाही. आता या स्पर्धेत मेधा कुलकर्णीही उतरल्याने पुणे लोकसभेसाठी भाजपमध्ये रस्सीखेच पाहायला मिळू शकते. त्यामुळे आता पुणे लोकसभा पोटनिवडणुकीत भाजपचा उमेदवार कोण असेल? कोणाला उमेदवारी द्यावी? हा पेच भाजप श्रेष्ठींपुढे निर्माण झाला आहे.

दादा, आम्ही सदैव तुमच्यासोबत! पिंपरीत NCP च्या माजी नगरसेवकाने भरचौकात फ्लेक्स लावला
दरम्यान, कसब्यातील पोटनिवडणुकीत टिळक कुटुंबीयांना डावलण्यात आल्याने ब्राह्मण समाजाचा रोषाचा सामना पक्षाला करावा लागला होता. तर २०१९ च्या विधानसभा निवडणुकीत हक्काचा मतदारसंघ सोडावा लागल्याची खंत मेधा कुलकर्णी यांच्या मनात आहेच. त्यामुळे कुलकर्णी यांना संधी देऊन भाजपला ही दुहेरी नाराजी दूर करण्याची संधी असल्याचं मत राजकीय जाणकारांनी व्यक्त केले आहे. पुणे जिल्ह्यात २१ विधानसभा मतदारसंघांपैकी एकही मतदारसंघ ब्राह्मण उमेदवाराकडे नसल्याने ब्राह्मण समाजाची भाजपवर नाराज आहे. यामुळे एकाच वेळी ब्राह्मण समाज अन् मेधा कुलकर्णी यांची नाराजी दूर करण्यासाठी कुलकर्णी यांची पुणे लोकसभेची लॉटरी लागू शकते, अशीही चर्चा राजकीय वर्तुळात जोरात सुरू आहेत.

पृथ्वीबाबांसोबत नाईलाजाने काम, तर ठाकरेंसोबत… अजित पवारांचा गौप्यस्फोट

LEAVE A REPLY

Please enter your comment!
Please enter your name here