श्रीमंत दगडूशेठ गणपतीचं आकर्षक स्वरुप, गाभाऱ्यात २१ हजार सूर्यफुलांची आरास
पुण्यातील आंब्यांचे प्रसिद्ध व्यापारी श्री देसाई बंधु आंबेवाले मंदार देसाई आणि त्यांच्या कुटुंबाच्या वतीने बाप्पाला हे आंबे दान करण्यात आले होते. अक्षय्य तृतीयेच्या दिवशी बाप्पाला आंब्यांचा नैवेद्य दाखवण्याची तसंच आंब्याची सजावट करण्याची ही वार्षिक परंपरा आहे. तसंच आंबा हे गणपती बाप्पाचं आवडतं फळ असल्याचंही मानलं जातं. आंबा व्यापारी देसाई बंधू आंबेवाले यांच्या हस्ते हे आंबे दान करण्यात आले होते.
श्रीमंत दगडूशेठ हलवाई सार्वजनिक गणपती ट्रस्टचे खजिनदार महेश सुर्यवंशी यांनी दिलेल्या माहितीनुसार, ११ हजार आंबे सजावटीसाठी वापरण्यात आले होते. त्यापैकी आंब्यांपैकी ५० टक्के आंबे हे धर्मादाय संस्थांना वाटण्यात आले. त्यानंतर बाप्पाची आरती झाल्यानंतर उर्वरित ५० टक्के आंबे भाविकांमध्ये प्रसाद म्हणून वाटण्यात आले. सजावटीसाठी वापरण्यात आलेले सुमारे १२०० आंबे ससून रुग्णालयातील रुग्णांना देण्यात आले.
बाप्पाच्या सजावटीसाठी वापरलेले आंबे सहज स्वच्छ करून खाता येतील अशा पद्धतीने वापरण्याचा प्रयत्न करण्यात आल्याची माहितीही त्यांनी दिली.
आंब्याच्या सजावटीचे डेकोरेटर सुभाष सरपाळे यांनी दिलेल्या माहितीनुसार, अक्षय तृतीयेच्या दिवशी सकाळी ६ वाजेपर्यंत मंदिराचा परिसर सजवण्यासाठी जवळपास ५० कामगारांनी रात्रंदिवस काम केलं. झेंडूच्या फुलांनी साडेपाच फुटांची सजावट करण्यात आली. मंदिराभोवती आंब्याचं आणि फुलांचं तोरण, फुलांची सजावट करण्यात आली होती.
