आठ दिवसात शिवाजी महाराजांचा पुतळा बसवणार; पोलिसांची यशस्वी मध्यस्थी!

कोल्हापूरः आठ दिवसात छत्रपती शिवाजी महाराजांचा पुतळा सर्व कायदेशीर बाबी पूर्ण करून पुन्हा सन्मानपूर्वक बसविण्याचा निर्णय वरिष्ठ पोलीस अधिकारी, तहसीलदार आणि गावातील पंच यांच्या बैठकीत घेण्यात आला आहे.

कर्नाटक सरकारने छत्रपती शिवाजी महाराजांचा पुतळा रातोरात हटवण्यात आल्यानंतर राज्यभरात संतापाची लाट उसळली आहे. राज्यातही या घटनेचे तीव्र पडसाद उमटले आहेत. तर, मणगुत्ती गावात पोलीस बंदोबस्त मोठ्या प्रमाणावर ठेवण्यात आला आहे. तहसीलदार आणि वरिष्ठ पोलीस अधिकारी,पंच मंडळी यांची बैठक पार पडली असून आठ दिवसांत एकमेकांच्या सहमतीने तोडगा काढण्याचा निर्णय घेण्यात आला आहे.

५ ऑगस्ट रोजी शिवाजी महाराजांचा पुतळा बसवण्यात आला होता. गावातील एका गटाचा त्याला विरोध होता. ग्राम पंचायतीने परवानगी दिली होती. पण पुतळा हलविण्यात आला. त्यामुळे ग्रामस्थ आक्रमक होते. गावातील महिला, तरुण संख्येने गावातील चौकात जमले होते. गावातील मुख्य रस्ता पोलिसांनी बॅरिकेड्स लावून रोखला होता. तेथे काही महिलांवर पोलिसांनी लाठीहल्ला केला. पण वरिष्ठ पोलीस अधिकाऱ्यांनी समजूत काढून वातावरण शांत करण्याचे प्रयत्न केले आहेत.

मनगुत्ती ग्रामपंचायतीच्या परनावगीने या गावातील एका चौकात छत्रपती शिवाजी महाराजांचा पूर्णाकृती पुतळा बसवण्यात आला होता. परवानगी न घेता हा पुतळा बसविल्याने तो हटवण्यात यावा यासाठी पोलिसांनी दबाव आणला होता. हा पुतळा चौकातून काढून दुसरीकडे एखाद्या सभागृहासमोर बसवावा असेही पोलिसांकडून सांगण्यात येत होते. पण त्याला नागरिकांना विरोध केला. पोलिसांच्या विरोधात मनगुत्ती येथील नागरिक रस्त्यावर उतरले होते. त्यानंतर पोलिसांनी माघार घेतली होती. मात्र, कर्नाटक सरकारने आदेश दिल्यानंतर शुक्रवारी रातोरात हा पुतळा पोलिसांनी हटवला. सरकारच्या या मनमानी कारभारावरून महाराष्ट्र-कर्नाटक सीमेवरील शिवभक्तांमध्ये संतापाची लाट पसरली आहे. गावातील दोन गटातील वादातून हा पुतळा हटविण्यात आल्याचा खुलासा कर्नाटक सरकार करत आहे. पण शिवाजी महाराजांचा पुतळा हटविण्यात जी तत्परता सरकारने दाखवली, त्यामध्ये त्यांचा महाराष्ट्र द्वेष लक्षात येत असल्याची टीका होत आहे.