करोना चाचण्यांचा घोळ; तुकाराम मुंढे भाजपच्या निशाण्यावर

नागपूर: चाचणीबाबत खासगी व सरकारी अशा दोन्ही प्रयोगशाळांतून येणारे काही अहवाल धक्कादायक व धोकादायक आहेत. एकाच रुग्णांचे एका दिवसात परस्परविरोधी अहवाल येत आहेत. हा रुग्ण व त्यांच्या नातेवाईकांना वेठीस धरण्याचा प्रकार असून, यामुळे एखाद्याचं आयुष्य उद्ध्वस्त होण्याचीही भीती आहे. असा प्रकार यापुढे होऊ नये याची काळजी आयुक्तांनी घेणे गरजेचे आहे. मात्र, प्रशासन यावर कुठलीही भूमिका घेत नसल्याने नागपूरकरामंध्ये प्रशासनाबद्दल अविश्वास वाढत असून, संभ्रमातही भर पडत आहे. या शब्दात भाजपने आयुक्त यांच्यावर निशाणा साधला आहे. आमदार व ज्येष्ठ नगरसेवक दयाशंकर तिवारी यांनी या मुद्यावरून आयुक्त मुंढे यांना घेरण्याचा प्रयत्न केला आहे. ( BJP MLA Targets )

वाचा:

खासगी प्रयोगशाळा व रुग्णालय पैसे कमविण्यासाठी करोना रुग्णांना लक्ष्य करीत आहेत. करोना रुग्णांची संख्या दिवसेंदिवस वाढत असून, गंभीर रुग्णांवर शासकीय रुग्णालयात उपचार सुरू आहेत. इतर रुग्ण खासगी रुग्णालयांत भरती आहेत. सकाळी पॉझिटिव्ह, दुपारी निगेटिव्ह आणि सायंकाळी रुग्ण घरी असे चित्र आहे. एकाच रुग्णाच्या चाचणीचे असे वेगवेगळे अहवाल येणे, धोकादायकच नसून, नागपूरकरांच्या मनात भीती व शंका वाढविणारे आहे. याला वेळीच आवर घालून संबंधितांकडून तातडीने खुलासा मागण्याची गरज आहे. केवळ रुग्णांचे अहवालच नव्हे तर पीपीई कीट, खाटांचे शुल्क व चाचणीच्या नावावरही रुग्णांकडून पैशांची लूट सुरू आहे. धक्कादायक म्हणजे करोनातून बरा झालेल्या रुग्णास घरी नव्हे तर रस्त्यांवर सोडून दिले जाते. हे अनाकलनीय आहे. एवढेच काय तर पालिकेचे डॉक्टर काही रुग्णांना घरीच राहण्याचा सल्ला देतात विना चाचणी प्रकृती सुधारल्याची माहिती देतात, असा आरोप करताना मनपा करोना रुग्ण वाढविण्याच्या तयारीत आहे का? असा सवालही खोपडे व तिवारी यांनी उपस्थित केला आहे.

वाचा:

पाच हजार खाटांचे कोविड सेंटर उद्ध्वस्त

गाजावाजा करून राधास्वामी सत्संग येथे उभारलेले ५ हजार खाटांचे कोविड सेंटर उद्ध्वस्त झाले आहे, अशी टीका खोपडे यांनी केली. एखाद्या रुग्णालयातील रुग्ण पॉझिटिव्ह आला तर सबंध रुग्णालय सील करण्यात येते. झोन क्र. ८ जवळील एका रुग्णालयात रुग्ण व तेथील कर्मचारी पॉझिटिव्ह आल्यानंतरही रुग्णालय कसे सुरू होते?, असा प्रश्न त्यांनी केला. रुग्णालयावर दयामाया न दाखविता शासनाच्या मार्गदर्शक सुचनेनुसार करवाई करावी, अशी मागणी आमदार खोपडे यांनी केली.

वाचा: