Mumbai Weather Update: मुंबईच्या वातावरणात सातत्याने बदल होत आहेत. गेल्या काही दिवसांपासून पाऊस आणि ढगाळ वातावरणामुळं उकाडा कमी जाणवत होता.
म. टा. विशेष प्रतिनिधी, मुंबईः यंदाचा मे महिना मुंबईकरांसाठी कमी तापदायक ठरण्याची शक्यता वर्तवण्यात येत आहे. मे महिन्याच्या पहिल्या आठवड्यापर्यंत राज्यात वारा खंडित प्रणालीमुळे पावसाळी वातावरण होते. या पार्श्वभूमीवर कमाल तापमानाचा पारा उतरला होता. येत्या काळात नैऋत्य वाऱ्यांमुळे येणाऱ्या पावसाचेही वेध लागायला सुरुवात होईल. त्यामुळे मुंबईचे तापमान ३८ अंशांपर्यंत जाण्याची शक्यता सध्या कमी जाणवत असल्याचे अनुमान प्रादेशिक हवामान विभागाने वर्तवले.शुक्रवारी आणि शनिवारी पुन्हा एकदा उकाड्याची जाणीव झाल्याची तक्रार मुंबईकरांनी केली. मात्र दोन्ही दिवशी तापमानाचा पारा सांताक्रूझ आणि कुलाबा या दोन्ही केंद्रांवर ३२ ते ३३ अंशांदरम्यान होता. शनिवारी कुलाबा येथे कमाल तापमान ३२.५, तर सांताक्रूझ येथे ३२.९ अंश सेल्सिअस होते. दोन्ही केंद्रांवरील कमाल तापमान हे सरासरीपेक्षा एका अंशाने कमी होते. शुक्रवारीही कुलाबा येथे ३२.२, तर सांताक्रूझ येथे ३२.७ अंश सेल्सिअस तापमान नोंदवले गेले. मात्र असे असताना हे तापमान ३२ अंशांहून अधिक जाणवल्याचा अनुभव मुंबईकरांनी सांगितला. अंशतः ढगाळ वातावरण आणि आर्द्रता, तसेच पूर्वेकडून येणारे वारे, यांमुळे तापमान कमी असतानाही पुन्हा एकदा उकाड्याची जाणीव होऊ लागली आहे. १० तारखेनंतर मुंबईत कमाल तापमान ३५ ते ३६ अंशांपर्यंत पोहोचू शकते. मात्र त्या पलीकडे कमाल तापमानाचा पारा फारसा चढा नसेल, असे प्रादेशिक हवामान विभागाच्या अधिकारी सुषमा नायर यांनी स्पष्ट केले. या काळात आर्द्रता वाढू लागल्यावर अस्वस्थता निर्देशांक वाढेल, अशी शक्यता त्यांनी वर्तवली.
सध्या बंगालच्या उपसागरात निर्माण झालेली प्रणाली, तसेच १५ मेनंतर वाऱ्यांची दिशा बदलण्यास सुरुवात होईल, यामुळे तापमान वाढण्यास खूप वाव मिळणार नाही, अशी शक्यता आहे. यंदा कोकण विभागात उष्णतेच्या लाटा अधिक अनुभवण्यास मिळाल्याने नागरिकांना एप्रिल आणि मे या दोन महिन्यांत तापमानाचा तडाखा अधिक बसेल, अशी भीती वाटत होती. एकामागून एक निर्माण झालेल्या तीन पश्चिमी प्रकोपांमुळे, तसेच वारा खंडितता स्थितीमुळे पावसाळी वातावरण निर्माण होऊन कमाल तापमान नियंत्रणात आले आणि मुंबईकरांना दिलासा मिळाला.
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
Like this:
Like Loading...
