Karnataka Assembly election 2023: कर्नाटक विधानसभा निवडणुकीची रणधुमाळी सुरु झाली आहे. प्रचार अंतिम टप्प्यात असताना राज्यातील नेते कर्नाटक मोहिमेवर गेले आहेत.
म. टा. विशेष प्रतिनिधी, मुंबईः गेली अनेक दशके प्रलंबित असलेल्या सीमाप्रश्नाच्या वादामुळे महाराष्ट्रात कर्नाटकविषयी कटुतेची भावना असली, तरीही राज्यातील नेते ही सर्व कटुता विसरून सध्या कर्नाटक मोहिमेवर आहेत. कर्नाटक विधानसभा निवडणुकीचा प्रचार अंतिम टप्प्यात आल्याने आपापल्या पक्षाच्या उमेदवारांना विजयी करण्यासाठी मुख्यमंत्री एकनाथ शिंदे, उपमुख्यमंत्री देवेंद्र फडणवीस, माजी मुख्यमंत्री आणि काँग्रेस नेते अशोक चव्हाण, रिपब्लिकन पक्षाचे नेते रामदास आठवले आदी महाराष्ट्राचे नेते प्रचाराच्या रणधुमाळीत उतरले आहेत.येत्या १० मे रोजी कर्नाटकध्ये विधानसभा निवडणुकीसाठीची मतदान प्रक्रिया पार पडणार आहे. त्यासाठी उपमुख्यमंत्री देवेंद्र फडणवीस हे काही दिवसांपासून कर्नाटकमध्ये मुक्काम ठोकून आहेत. त्यांनी गेल्या आठवडाभरात भाजपच्या उमेदवारांसाठी प्रचारसभांचा जोर लावला आहे. मराठीबहुल बेळगाव परिसरातही त्यांनी भाजप उमेदवारांचा प्रचार केला. दुसरीकडे काँग्रेसचे नेते आणि माजी मुख्यमंत्री अशोक चव्हाण, पृथ्वीराज चव्हाण यांनीही काँग्रेस उमेदवारांसाठी मतदारांना साद घातली. कर्नाटक विधानसभा निवडणुकीच्या प्रचारासाठी जेमतेम दोन दिवस शिल्लक असताना मुख्यमंत्री एकनाथ शिंदे ७ मे अर्थात रविवारपासून प्रचारात उतरत आहेत. कर्नाटकात शिंदे यांच्या पक्षाचे उमेदवार नाहीत. मात्र भाजपश्रेष्ठींच्या सूचनेवरून ते भाजपच्या उमेदवारांचा प्रचार करणार आहेत. त्यानुसार शिंदे हे रविवारी सकाळी बेंगळुरू येथील कबोन पार्क येथील मतदारांशी संवाद साधतील.
केंद्रीय गृहमंत्री अमित शहा हे रविवारी बेंगळुरूमध्ये रोड शो करणार आहेत. त्यातही शिंदे सहभागी होणार आहेत. सोमवारी, शिंदे उडपी जिल्ह्यातील कापू विधानसभा मतदारसंघातील भाजप उमेदवाराचा प्रचार करणार आहेत. रिपब्लिकन पक्षाचे नेते आणि केंद्रीय राज्यमंत्री रामदास आठवले हेदेखील शनिवारपासून दोन दिवस कर्नाटकात भाजप उमेदवारांसाठी सभा घेणार आहेत. बेळगाव, बिदर, भालकी या परिसरात आठवले प्रचारासाठी फिरणार आहेत. उद्धव ठाकरे यांच्या पक्षाचे खासदार संजय राऊत हे सीमाभागात महाराष्ट्र एकीकरण समितीच्या उमेदवारांसाठी सभा घेत आहेत. याशिवाय काँग्रेसचे सुनील केदार, आमदार सतेज पाटील, प्रणिती शिंदे, भाजपचे आ. प्रसाद लाड, चित्रा वाघ आदी आपापल्या पक्षाच्या उमेदवारांसाठी मेहनत घेत आहेत.
Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
Like this:
Like Loading...
