नवी दिल्ली: जेएनयूतील विद्यार्थ्यांवर झालेल्या हल्ल्याच्या पार्श्वभूमीवर प्रसिद्ध अभिनेत्री , विद्यार्थी नेता कन्हैया कुमार आणि आइशी घोष यांनी आज जेएनयूत येऊन विद्यार्थ्यांच्या धरणे आंदोलनात भाग घेतला. यावेळी दीपिकाने विद्यार्थ्यांशी संवाद साधत त्यांच्यावरील हल्ल्याची माहिती घेतली. तर कन्हैया कुमारने ‘जयभीम’चे नारे देत विद्यार्थ्यांवरील हल्ल्याचा निषेध नोंदवला.

जेएनयूतील विद्यार्थ्यांवर झालेल्या हल्ल्यानंतर देशभरातील विद्यार्थ्यांनी आंदोलन सुरू केलं आहे. अनुराग काश्यप, अनुराग बसू, तापसी पन्नू, गौहर खान, दीया मिर्झा, विशाल भारद्वाज, रेखा भारद्वाज, राहुल बोस, रिचा चढ्ढा, अली फजल, रिमा कागतीसह अनेक कलाकारांनी जेएनयूतील विद्यार्थ्यांना दिलासा दिला आहे. जेएनयूत आजही विद्यार्थ्यांची निदर्शने सुरू होती. त्यामुळे दीपिका पादुकोण आणि कन्हैया कुमार यांनी जेएनयूत येऊन या निदर्शनात भाग घेतला. सायंकाळी ७.४५ वाजता जेएनयूमध्ये आली होती. ती १० मिनिटं विद्यार्थ्यांसोबत होती. त्यांच्या समस्या जाणून घेतल्या आणि त्यानंतर काहीही न बोलता निघून गेली. यावेळी कन्हैया कुमारने ‘जयभीम’च्या घोषणा देतात विद्यार्थ्यांनीही ‘जयभीम’चा जयघोष केला.

‘छपाक’वर बहिष्कार टाका: भाजप

दरम्यान, दीपिकाने जेएनयूतील निदर्शनात भाग घेतल्यामुळे भाजपने तिच्यावर टीका केली आहे. भाजपचे दिल्लीतील प्रवक्ते तेजिंदरपाल सिंह बग्गा यांनी दीपिकाच्या छपाक या सिनेमावर बहिष्कार टाकण्याचं आवाहन केलं आहे. बग्गा यांनी ट्विट करून हे आवाहन केलं आहे.

दरम्यान, जवाहरलाल नेहरू विद्यापीठ विद्यार्थी संघटनेची अध्यक्षा आईशी घोषसह १९ जणांविरुद्ध दिल्ली पोलिसांनी एफआयआर दाखल करण्यात आला आहे. ४ जानेवारी रोजी विद्यापीठातील सर्व्हर रुमची तोडफोड आणि सुरक्षा कर्मचाऱ्यांवर हल्ला करण्याच्या आरोपात हा गुन्हा दाखल करण्यात आला आहे. तर मुंबईत गेटवे ऑफ इंडिया येथे आंदोलनादरम्यान ‘फ्री काश्मीर’ (काश्मीर स्वतंत्र करा) हे पोस्टर झळकवणाऱ्या महक मिर्झा प्रभू या मुलीवर गुन्हा दाखल करण्यात आला आहे. यासोबतच सुवर्णा साळवे, फिरोझ मिठीबोरवाला, जेएनयूचा माजी विद्यार्थी आणि कार्यकर्ता उमर खालिद यांसह एकूण ३१ आंदोलनकर्त्यांवर एफआयआर दाखल करण्यात आला आहे.