भगतसिंह कोश्यारींची हुशारी: कोर्टाच्या निर्णयावर मोजक्या शब्दांत भाष्य, ठाकरेंबद्दल म्हणाले…
कोर्टाने आपल्या निर्णयात भरत गोगावलेंची नियुक्ती बेकायदेशीर ठरवली आणि ठाकरेंना नवा मार्ग कोर्टाने मोकळा करुन दिला. कारण, आता ज्या प्रतोदाला विधीमंडळात महत्त्वाचे अधिकार असतात, तो प्रतोदच आता ठाकरेंसोबत असल्यामुळे नवा सस्पेन्स तयार झाला आहे.
व्हिपचे अधिकार आणि ठाकरेंना फायदा कसा होणार?
– प्रतोदाची विधीमंडळात महत्त्वाची भूमिका, आमदारांना आदेश व्हिपकडूनच जातात
– प्रतोदाने बजावलेला आदेश मान्य करणे आमदारांना अनिवार्य
– आदेशाचं उल्लंघन केल्यास पक्षांतर बंदी कायद्यांतर्गत अपात्रता होते
– मूळ शिवसेनेत सुनिल प्रभू हे ठाकरेंकडून नियुक्त व्हिप
– महाविकास आघाडीला शिंदे सरकारवर अविश्वास ठराव आणण्याचा पर्याय
– अविश्वास प्रस्तावावर पक्षाच्या बाजूने (शिवसेना उ.बा.ठा.) मतदान करा, असा आदेश शिंदे गटाच्या आमदारांना देण्याचा ठाकरेंच्या व्हिपला अधिकार
– ठाकरे गटाच्या व्हिपने दिलेला आदेश अमान्य केल्यास अपात्रतेची कारवाई अटळ
– ठाकरे गटाचा व्हिप अधिकृत ठरवल्यामुळे शिंदेंची भविष्यातली धाकधूक कायम
दरम्यान, कोर्टातल्या निर्णयानंतर ठाकरेंनी जेव्हा पहिली प्रतिक्रिया दिली तेव्हा त्यांनीही व्हिप हा आमचा असल्यामुळे निकाल आमच्याच बाजूने आलाय असा दावा केला. कारण, व्हिपचे अधिकार हे आमदारांसाठी अनिवार्य असतात आणि शिंदे गटाच्या आमदारांसाठी जर सुनिल प्रभू यांनी व्हिप बजावला तर मात्र अडचणी वाढू शकतात. त्यामुळे महाविकास आघाडीने शिंदे सरकारवर अविश्वास प्रस्ताव आणून शिंदे गटाच्या आमदारांनाही व्हिप बजावणे हा पर्याय वापरला जाईल का, ठाकरे शिंदे सरकारची व्हिपच्या माध्यमातून कोंडी करतील का, हे तीनही पक्षांचं एकमत झाल्यानंतरच स्पष्ट होईल.
