२०१६ पासून स्पर्धा – परीक्षांची तयारी सुरू केली
दहावीच्या शिक्षणानंतर पुढील शिक्षणासाठी सचिनने छत्रपती संभाजी नगर शहर गाठलं. इथे त्याने राज्यशास्त्रातून पदवी मिळवली. सोबतच्या मित्रांचं वातावरण बघून त्याला स्पर्धा परीक्षा देण्याची इच्छा झाली. यामुळे २०१६ पासून तो स्पर्धा परीक्षेची तयारी करू लागला. स्पर्धा परीक्षा द्यायची असेल तर शिकवणी लावणं आवश्यक असतं, मात्र सचिनची आर्थिक परिस्थिती नाजूक असल्यामुळे त्याला क्लास किंवा लायब्ररी लावण्यासाठी पैसे नव्हते. त्यामुळे त्याने रात्री पाळी करून सुरक्षारक्षकाची नोकरी केली आणि दिवसा अभ्यास केला.
दिवसेंदिवस घरची परिस्थिती बिकट होत होती
स्पर्धा परीक्षेत यश मिळवण्यासाठी सचिनने जीव ओतून अभ्यास केला. दरम्यान २०१६ ते २०२१ दरम्यान त्याने वेगवेगळ्या परीक्षा दिल्या. यामध्ये दोन वेळा पीएसआयसाठी त्याला यश मिळालं मात्र उंची कमी भरल्याने त्याचीही संधी हातातून गेली. याच काळात त्याने कर सहाय्यक, लिपिक या परीक्षेतही यश मिळवलं. मात्र अंतिम क्षणी यशाने हुलकावणी दिली. यश-अपयश येत असताना सचिनची आर्थिक परिस्थिती दिवसेंदिवस खालावत चालली होती. रात्रपाळी करून दिवसा अभ्यास करूनही यश मिळत नव्हतं. करोना काळात लॉकडाउन लागलं. त्यानंतर स्पर्धा परीक्षेच्या जाहिराती आल्या नाही. त्याचबरोबर दिवसेंदिवस घरची परिस्थिती बिकट होत होती. यामुळे सचिनवर जबाबदारी वाढली होती. स्पर्धा परीक्षेवर अवलंबून न राहता त्याला काहीतरी काम करणं गरजेचं होतं.
स्पर्धा-परीक्षांमध्ये अपयश, तरुणाने न खचता सुरू केला स्वत:चा बिजनेस, आता लाखोची कमाई
घरच्या बिकट परिस्थितीमुळे व्यवसाय करण्याचं ठरवलं
घरची परिस्थिती नाजूक होत असल्यामुळे सचिनने काहीतरी व्यवसाय करायचा निर्णय घेतला. त्याने चहा नाश्त्याचा व्यवसाय करायचे त्यांनी ठरवलं, मात्र हा व्यवसाय सुरू करायचा असला तरी किमान लाखभर रुपये भांडवल गरजेचं होतं. सचिनकडे आर्थिक पाठबळ नव्हतं, यावेळी त्याने ही गोष्ट मित्रांना बोलून दाखवली मित्रांनी त्याला भांडवल खरेदीसाठी मदत केली. त्यानंतर सचिनने छत्रपती संभाजीनगर शहरामध्ये माऊली नाष्टा सेंटर सुरू केलं. यासाठी त्याला एक लाख रुपये खर्च आला. सचिनने व्यवसाय सुरू केला, त्याला कुठलाही अनुभव नव्हता. पहिल्याच दिवशी त्याचा ७० रुपये धंदा झाला. यामुळे आपण निर्णय घेऊन चुकलो, तर नाही ना असा विचार सचिनच्या मनात आला. मात्र सचिनने चिकाटी आणि संयम ठेवून व्यवसाय टिकून राहण्यासाठी प्रयत्न केले. क्वालिटी दिली आणि यामुळे हळूहळू ग्राहक वाढत गेले. आता तो महिन्याला दोन लाख रुपये उत्पन्न मिळवतो.
चहा-नाश्ता सेंटरमधून मोठी कमाई
सचिनने याबाबत बोलताना सांगितलं, की चहा-नाष्टा सेंटर सकाळी पाच वाजल्यापासून ते रात्री आठ वाजेपर्यंत सुरू असतं. क्वालिटी मिळत असल्यामुळे ग्राहकांची संख्या वाढत आहे. त्यामुळे मी काही कामगार कामासाठी ठेवले आहेत. सहा जणांना माझ्याकडून रोजगार मिळतो. आमच्याकडे चहा, पोहे, शिरा, उपमा, खिचडी हे पदार्थ बनवले जातात. भविष्यात हा व्यवसाय वाढवून महाराष्ट्रभर शाखा सुरू करण्याचा विचार असल्याचं सचिन सांगतो.
नोकरी शोधणारा बनला रोजगार देणारा
सचिनच्या चहा नाश्ता सेंटरवर सकाळी पाच वाजल्यापासून ते रात्री ८ पर्यंत या ग्राहक येत असतात. त्यामुळे कामगारांची गरज निर्माण झाली. नोकरी शोधणाऱ्या सचिनने आता सहा जणांना रोजगार दिला आहे. या व्यवसायातून त्याला महिन्याला दोन लाखांचं उत्पन्न मिळू लागलं. तो चहा, पोहे, शिरा, उपमा, खिचडी यासारखे पदार्थ बनवतो. यातून दिवसाला १५ हजारांचा धंदा होतो. भविष्यात हा व्यवसाय महाराष्ट्रामध्ये वाढवायचा असून त्यासाठी मी प्रयत्न करत असल्याचे सचिन जाधव सांगतो.
