Vande Bharat Express Nagpur To Hyderabad; नागपूर-हैदराबाद वंदे भारत एक्स्प्रेस लवकरच सुरू होणार? मोठी अपडेट आली समोर

चंद्रपूर : नागपूर ते हैदराबाद वंदे भारत एक्स्प्रेस सुरू करण्याबाबत केंद्रीय रेल्वे मंत्री अश्विनी वैष्णव यांना महाराष्ट्राचे वन, सांस्कृतिक कार्य व मत्स्य व्यवसाय मंत्री सुधीर मुनगंटीवार यांनी नागपूर- हैद्राबाद रेल्वे सुरू करण्याबाबत पत्र लिहिले होते. २० डिसेंबर २०२२ ला त्यांनी रेल्वे मंत्र्यांना पत्र लिहले होते. या पत्राची दखल रेल्वे मंत्र्यांनी घेतली आहे. आता नागपूर-हैदराबाद ‘वंदे भारत एक्स्प्रेस’ लवकरच सुरू होणार आहे.नागपूर आणि हैदराबाददरम्यानचे अंतर ५८१ किलोमीटर आहे. यासाठी सध्याच्या रेल्वेगाड्या सर्वसाधारणपणे दहा तासांचा कालावधी घेतात. नागपूर-हैदराबाद वंदे भारत एक्स्प्रेस सुरू झाल्यास हा कालावधी दहा तासांवरून साडेसहा तासांचा होणार आहे. त्यामुळे नागरिकांना याचा लाभ होणार आहे.

ही रेल्वे सुरू करण्याची मागणी सुधीर मुनगंटीवार यांनी केली होती. नागपूर, गोंदिया, भंडारा, चंद्रपूर या विदर्भातील जिल्ह्यांना नागपूर-हैदराबाद वंदे भारत एक्स्प्रेस ट्रेनची प्रतीक्षा होतीच. खासदार रामदास तडस यांच्या मागणीनुसार सुधीर मुनगंटीवार सेवाग्राम येथे वंदे भारत एक्स्प्रेसला थांबा देण्यासाठी पाठपुरावा करणार आहेत. त्यामुळे वर्धा जिल्ह्यातील जनतेसह पाचही जिल्ह्यांतील व्यापारी वर्गाला आणि नागरिकांना या रेल्वे सेवेचा मोठ्या प्रमाणात लाभ होणार आहे.

महाराष्ट्रात २० कोटी वर्षांपूर्वीचा खजिना आढळला! फोटो पाहून कुणाचाही विश्वास बसणार नाही
कसं आहे वेळापत्रक?

सकाळी सहा वाजता नागपूर स्थानकावरून नागपूर-हैदराबाद वंदे भारत रेल्वे सुटणार आहे. दुपारी साडेबारा वाजता ती हैदराबादला पोहोचेल. हैदराबादहून दुपारी दीड वाजता ही एक्स्प्रेस निघेल आणि रात्री आठ वाजता नागपूर येथे पोहोचेल. या ‘वंदे भारत एक्स्प्रेस’ला बल्लारशहा, सिरपूर, कागजनगर, रामगुंडम, काझीपेठ या स्थानकांवर थांबा राहणार आहे. आता या गाडीला सेवाग्राम येथेही थांबा देण्यात यावा, यासाठी प्रयत्न सुरू झाले आहेत.

Ashish Deshmukh : २० वर्ष मंत्री राहिलेल्या काकांना हरवले, आमदार झाले; पण आता स्वतःचीच पक्षातून हकालपट्टी