जालना : जालना जिल्ह्यातील बदनापूर तालुक्यातील काजळा येथील अशोक पांढरे या शेतकऱ्यानं नवा प्रयोग केला आहे. परदेशातून मागविण्यात आलेल्या बाजरीतून त्यांना चांगल्या उत्पन्नाची आशा आहे. एकरी तब्बल ४० क्विटल बाजरीचे उत्पन्न होणार आहे, असं पांढरे यांनी सांगितलं. जालना- अंबड महामार्गावर असलेले काजळा हे गाव. काजळा हे एकेकाळी सतत पाणी टंचाईचा सामना करणारे गाव म्हणून ओळखले जात होते. अलीकडे या गावातील काही शेतकरी पारंपरिक शेतीला फाटा देऊन आधुनिक शेती मार्ग स्वीकारु लागले आहेत. यासाठी नवीन बियाणांची लागवड करून कमी खर्चात अधिक उत्पन्न घेत आहेत. अशोक मुकुंदराव पांढरे हे त्यापैकी एक शेतकरी, दहावी पर्यंत शिक्षण झाल्याने आधुनिक शेतीकडे कल असणारे शेतकरी म्हणून त्यांची ओळख आहे. गतवर्षी त्यांनी एका एकरात काकडीची लागवड केली. त्यातून भरघोस उत्पन्न झाले. शिवाय ३० गुंठ्यात कारले लावले त्यातून दोन लाख रुपये कमवले होते.अशोक पांढरे यांनी तुर्की येथून तुर्की बाजरीचे बियाणे मागितले. या तुर्की बाजरीच्या बियाणांची एका एकर क्षत्रवर लागवड केली. एकाच एकरात त्यांना ४० क्विटल बाजरी होणार आहे. भारतातील संकरित बाजरी लागवडीतून एकरी १२-१४ क्विंटल उत्पन्न मिळते. तर गावरान बाजरी लागवडीतून एकरी १० क्विंटल उत्पन्न मिळते. पांढरे यांनी १ फेब्रुवारी २०२३ रोजी तुर्कीच्या बाजरीची लागवड केली होती. खतं आणि ठिबक सिंचनावर साडेतीन महिन्यातच तुर्कीची बाजरी तोडणीस आली आहे. एका एकरात त्यांना ४० क्विटल उत्पन्न होणार आहे. या तूर्की बाजरीचे कणीस हे तीन ते चार फुट उंचीचे आहे. पांढरे यांचे हे बाजरीचे पीक बघण्यासाठी अनेक शेतकरी एकच गर्दी करीत आहेत.तुर्की बाजरीच्या बियाण्याबाबत पांढरे त्यांचा अनुभव सांगतात की,शेतीत काहीतरी नवा प्रयोग करून पाहावा ज्यातून आर्थिक उन्नती तर होईलच शिवाय इतर शेतकऱ्यांना पण त्याचा फायदा होईल, असं वाटत होतं. शेतीमधील वेगवेगळे प्रयोग यूट्युब वर बघत असताना त्यांना तुर्की बाजरीच्या बियाण्याची माहिती मिळाली.या बियाण्याची उगवण क्षमता, कणीसाची मोठी लांबी,त्यामुळे मिळणारे जास्तीचे उत्पन्न यावर त्यांनी सखोल माहिती घेतली. आपल्याकडील बाजरी पेक्षा तीन पट उत्पन्न मिळत असल्याने त्यांनी तुर्की येथील संबंधित कंपनीशी संपर्क साधून एक हजार पाचशे रूपये किलो दराने एक किलो तुर्की बाजरीचे बियाणे मागविले आणि त्याची लागवड देखील केली, असं पांढरे यांनी म्हटलं. तुर्की बाजरीच्या बियाणांची लागवड करून ती यशस्वी झाल्याचा आनंद आता त्यांना खऱ्या अर्थाने झाला आहे.आपल्याकडील बाजरीचे भाव क्विटल मागे ३ हजार रुपये एवढे आहेत. तुर्की बाजरीचे एकरी ४० क्विटल उत्पन्न होईल, अशी आशा पांढरे यांना आहे. आता त्यांनी त्यांच्या सोबतच इतरही शेतकऱ्यांचा विचार करून उत्पादित होणाऱ्या बाजरीचे वाण ५०० रुपये किलोने विकणार असल्याचं सांगितलं आहे.ज्यामुळे हे तुर्की वाण शेतकऱ्यांना स्वस्तातही पडेल आणि त्यांचेही उत्पादन वाढण्यास मदत होईल. या विक्रीतून पांढरे यांना त्यातून किमान १० ते १५ लाखांचे निव्वळ उत्पन्न पदरात पडणार आहे. शेतकऱ्यांना या नवीन बाजरीच्या बियाणांची ओळख व्हावी शिवाय त्यांच्या मालाच्या उत्पन्नात वाढ व्हावी या हेतूने त्यांनी बाजरीचे बियाणे शेतकऱ्यांनाच विकण्याचे ठरवले आहे. मराठवाड्यातील शेतकरी आज नैसर्गिक संकटामुळे बेजार झाला आहे.तुर्की बाजरीचे बियाणे लागवडीचा आपण केलेला प्रयोग यशस्वी झाला आहे.असाच प्रयोग मराठवाड्यातील शेतकऱ्यांनी करून पैसे कमवावेत अशी अपेक्षा पांढरे व्यक्त करतात.
