जळगाव : जळगाव शहरापासून जवळ असलेल्या बांभोरी येथील जैन कंपनीसमोर एक दुर्दैवी घटना घडली. भरधाव वेगाने येणाऱ्या ट्रकने पुढे जात असलेल्या दुचाकीला जोरदार धडक दिल्याने पती ठार झाले तर पत्नी गंभीर जखमी झाल्याची घटना शनिवारी दुपारी साडेबारा वाजेच्या सुमारास घडली. हेमंत काशिनाथ चौधरी (वय ५०, रा. खोटे नगर, जळगाव) असं मयताचं नाव आहे. हेमंत हे त्यांच्या पत्नीला कामावर सोडण्यासाठी जात होते. कंपनी अवघ्या काही अंतरावर हा अपघात झाला. यात मयत हेमंत यांच्या पत्नी माधवी हेमंत चौधरी (वय ४५) या जखमी झाल्या असून त्यांना उपचारार्थ जिल्हा शासकीय वैद्यकीय महाविद्यालयात दाखल करण्यात आलं आहे. जळगाव शहरातील खोटे नगर परिसरात हेमंत चौधरी हे आपल्या पत्नी माधवी हेमंत चौधरी यांच्यासह वास्तव्याला होते. हेमंत चौधरी हे जळगाव शहरातील पोलनपेठ परिसरात मेडीकल डिस्ट्रीब्यूटर म्हणून नोकरीला होते. तर हेमंत यांची पत्नी माधवी या बांभोरी गावाजवळील जैन कंपनीत नोकरीला आहेत. नेहमीप्रमाणे शनिवारी दुपारी साडेबारा वाजेच्या सुमारास पत्नीला कामावर सोडण्यासाठी हेमंत चौधरी हे त्यांच्या दुचाकीने खोटेनगराकडून जैन कंपनीकडे निघाले. यादरम्यान रस्त्यात बांभोरी गावानजीक एका भरधाव वेगाने येणाऱ्या ट्रकने त्यांच्या हेमंत चौधरी यांच्या दुचाकीला मागून जोरदार धडक दिली. या धडकेत चौधरी दाम्पत्य हे दुचाकीसह रोडच्या खाली फेकले गेले. या अपघातात दोघांच्या डोक्याला गंभीर दुखापत झाली आहे. रस्त्यावरील ये जा करणारे स्थानिक ग्रामस्थ आणि तरूणांच्या मदतीने दोघांना तातडीने जिल्हा शासकीय वैद्यकीय महाविद्यालयात उपारार्थ दाखल करण्यात आले. उपचारादरम्यान दोन तासात पतीचा मृत्यू; जखमी पत्नीवर उपचार सुरूहेमंत चौधरी यांच्यावर जिल्हा शासकीय वैद्यकीय उपचार सुरू असताना दुपारी अडीच वाजता त्यांची प्राणज्योत मालवली. वैद्यकीय अधिकारी डॉ. सचिन पाटील यांनी त्यांना मयत घोषित केले. अपघाताची माहिती मिळाल्यावर जिल्हा शासकीय वैद्यकीय महाविद्यालयात नातेवाईकांची मोठी गर्दी झाली. जखमी माधवी यांनी पती कुठे आहेत, त्यांना काही झालं तर नाही ना? अशी विचारणा नातेवाईकांना केली. मात्र, त्यांना मानसिक धक्का बसू नये म्हणून पती मयत झाल्याबाबत पत्नी माधवी यांना सांगण्यात आलेलं नाही. पती जखमी असून त्यांच्यावर उपचार सुरू असल्याचंच त्यांना नातेवाईकांकडून सांगण्यात आलं आहे. दरम्यान, या घटनेबाबत पोलिसांत अद्यापपर्यंत कुठलीही नोंद करण्यात आलेली नाही.
