Gautami Patil : गौतमी पाटीलबाबत छत्रपती संभाजीराजेंनी पहिल्यांदाच मांडले मत; स्पष्टपणे म्हणाले…
भाजपचे प्रदेशाध्यक्ष चंद्रशेखर बावनकुळे यांनी शिवसेनेला विधानसभेच्या ४८ जागा देणार, असे सांगून वाद ओढवून घेतला होता. शिवसेना खासदार गजानन कीर्तीकर यांनी तर थेट भाजपकडून सापत्नपणाची वागणूक मिळत असल्याचा आरोप केला होता. त्यातच शिवसेनेने राज्यातील २२ लोकसभा मतदारसंघांवर दावा ठोकल्याने भाजपची डोकेदुखी वाढली आहे. त्यामुळे भाजपनेही आता ‘प्लॅन बी’ तयार केला असून, २०२४मध्ये लोकसभेच्या ४० जागा जिंकण्याचे ध्येय ठेवले आहे. राज्यातील ४८ लोकसभा मतदारसंघांमध्ये संयोजकांची नियुक्ती करून, तेथे भाजपची ताकद वाढविण्याचे काम सुरू आहे. विशेष म्हणजे शिवसेनेच्या १३ खासदारांच्या मतदारसंघांमध्येही ‘वजनदार’ नेते संयोजक नेमण्यात आले आहेत.
आम्ही काय करायचे?
भाजपने शिंदे गटाच्या मतदारसंघात संयोजक नेमल्यावरून शिंदे गटाच्या खासदारांमध्ये नाराजीची भावना आहे. ‘आम्हाला विश्वासात न घेताच भाजपने ही कृती केल्याने तणाव निर्माण होऊ शकतो,’ असा दावा एका खासदाराने केला. ‘भाजपचा हा प्रयत्न आम्हाला आव्हान देणारा असल्याचे मत आणखी एका खासदाराने नोंदवले. आम्ही भाजपच्या चिन्हावर कदापि निवडणूक लढवणार नाही,’ असा दावाही या खासदाराने केला आहे.
शिवसेना पदाधिकारी म्हणतात…
– आम्ही अधिक जागा मागू नये यासाठीच संयोजक नियुक्तीची खेळी.
– हा निव्वळ दबावतंत्राचा भाग.
– विधिमंडळ किंवा न्यायालयात गडबड झाल्यास भाजपच्याच चिन्हावर लोकसभा लढवावी लागणार.
असे आहेत संयोजक
नाशिक : प्रा. देवयानी फरांदे, शिर्डी : राधाकृष्ण विखे पाटील, पालघर : संजय केळकर, नरेंद्र पवार, हातकणंगले : सुरेश हळवणकर, कोल्हापूर : धंनजय महाडीक, यवतमाळ-वाशिम : मदन ऐरावार, दक्षिण मध्य मुंबई : प्रसाद लाड, उत्तर पश्चिम मुंबई : अमित साटम, मावळ : संजय भेगडे, बुलढाणा : डॉ. संजय कुटे, कल्याण : रवींद्र चव्हाण, रामटेक : अरविंद गजभिये, हिंगोली : रामराव वडकुते.
