करोना हे भीषण संकट; 'या' उद्योजकाने व्यक्त केली मोठ्या नुकसानीची भीती

वृत्तसंस्था, नवी दिल्ली : कोविड-१९चा देशात होत असलेला संसर्ग, सातत्याने करावे लागत असलेले लॉकडाउन व त्यामुळे बंद पडलेले उद्योग या पार्श्वभूमीवर करोनाचे हे संकट शतकातील एकमेव भीषण संकट असल्याचे मत हिंदाल्को इंडस्ट्रीजचे अध्यक्ष आणि प्रसिद्ध उद्योगपती कुमारमंगलम बिर्ला यांनी व्यक्त केले आहे. याचा फटका समाज आणि अर्थव्यवस्था, दोघांनाही बसत असून चालू आर्थिक वर्षात देशाचा जीडीपीदेखील या संकटामुळे आक्रसणार आहे, असेही बिर्ला म्हणाले.

कंपनीच्या भागधारकांना उद्देशून लिहिलेल्या पत्रात कुमारमंगलम बिर्ला यांनी करोनामुळे देशाच्या अर्थव्यवस्थेची झालेली विदारक स्थिती मांडली आहे. त्यांनी सांगितले आहे की, देशाची आर्थिक स्थिती नाजूक झालेली असतानाच कोविड-१९ (करोना) संकट देशावर आले आहे. या संकटामुळे जागतिक स्तरावर अनिश्चितता निर्माण झाली असून त्याचा प्रभाव देशांतर्गत आर्थिक प्रणालीवरही पडत आहे. देशात लॉकडाउन काळात रेड व ऑरेंज झोन म्हणून जाहीर करण्यात आलेल्या जिल्ह्यांतूनच देशाच्या एकूण जीडीपीच्या ८० टक्के जीडीपी तयार होतो. या सर्व जिल्ह्यांमध्ये आर्थिक उलाढाल जवळजवळ बंदच आहे. या सर्वांमुळे गेल्या ४० वर्षांत प्रथमच देशाचा जीडीपी मोठ्या प्रमाणावर आक्रसणार आहे.

आर्थिक गाडा रुळांवर यावा यासाठी जगभरातील सरकारे मदत करत आहेत. विविध देशांच्या सरकारांनी आतापर्यंत नऊ लाख कोटी डॉलर इतकी मदत आपापल्या देशाला केली आहे. त्याचवेळी देशांच्या मध्यवर्ती बँकांनीही आर्थिक उपाययोजना केल्या आहेत. त्यामुळे मंदीचे कर्ज बुडवेगिरी आणि दिवाळखोरी यांसारखे परिणाम टाळता येणे शक्य होणार आहे, याकडेही त्यांनी लक्ष वेधले.

ही मंदी वेगळी
करोनामुळे आलेल्या मंदीचा उल्लेख करून बिर्ला म्हणाले, यावर्षी आर्थिक हालचाल मोठ्या प्रमाणावर आक्रसणार असल्यामुळे देशात मंदी आली आहे. मात्र ही मंदी आधीच्या मंदींपेक्षा वेगळी आहे. ही मंदी इतकी अचानक आली आहे की, कुणाला याबाबत अंदाजही बांधण्यास वेळ मिळालेला नाही. शिवाय या मंदीच्या वावटळीत संपूर्ण अर्थव्यवस्था सापडली आहे आणि सर्वच क्षेत्रे प्रभावित झाली आहेत. या मंदीची सकारात्मक बाजू ही आहे की, ही मंदी परिस्थितीजन्य असून यासारखी मंदी पुन्हा येणार नाही. ही मंदी अल्प काळासाठी आली आहे. करोनाची साथ पुन्हा एकदा येणार नाही, असेच मानून सर्व जग आपले व्यवहार खुले करत आहे. त्यामुळे एकदा जगभरातील लॉकडाउन उठवण्यात आल्यावर जगाची अर्थव्यवस्था कात टाकून नव्याने आणि अपेक्षेपेक्षा अधिक वेगाने प्रगती करू लागेल.