लोकसभा निवडणूकीच्या पार्श्वभूमीवर राज्यातील सर्वच पक्षांनी आखणी करण्यास सुरुवात केली आहे. मतदारसंघात आढावा बैठका घेत पक्षाचे मजबुतीकरण करण्यासाठी पदाधिकाऱ्यांनी आपली कंबर कसली आहे. जागा वाटपाच्या चर्चा सध्या सुरु असून त्या जागांवर आपली वर्णी लावण्यासाठी इच्छुकांमध्येही चढाओढ लागली असल्याचे दिसते. कल्याण लोकसभा मतदारसंघ हा शिवसेनेचा बालेकिल्ला असून मुख्यमंत्र्यांचे सुपुत्र खासदार डॉ. श्रीकांत शिंदे हे या मतदारसंघाचे प्रतिनिधीत्व करत आहेत.
शिंदेंचे २२ आमदार, ९ खासदार बाहेर पडणार; ठाकरेंच्या विश्वासूने नाराजांची नावेही सांगितली
या मतदारसंघावर भाजपाने आपले लक्ष केंद्रीत केल्यानंतर महाविकास आघाडीने देखील या ठिकाणी चाचपणी करण्यास सुरुवात केली आहे. कल्याण लोकसभेसाठी राष्ट्रवादीकडून आनंद परांजपे यांच्या नावाची चर्चा होत असतानाच ठाकरे गटाकडून माजी आमदार सुभाष भोईर यांच्या नावाची चर्चा सुरु झाली आहे. भोईर यांच्या वाढदिवसानिमित्त शहरात पदाधिकाऱ्यांकडून बॅनरबाजी करण्यात आली असून या बॅनरवर भोईर यांचा भावी खासदार असा उल्लेख करण्यात आला आहे. यामुळे भोईर हे लोकसभेची निवडणूक लढविण्यास इच्छुक असल्याचे संकेत मिळत आहेत.
ठाणे जिल्ह्यातील कल्याण लोकसभा मतदार संघ हा शिवसेनेचा बालेकिल्ला राहिला आहे. या मतदार संघात सहा विधानसभा क्षेत्र असून सहापैकी तीन जागांवर भाजपाचे वर्चस्व आहे. कल्याण ग्रामीणमध्ये मनसेचे तर अंबरनाथमध्ये शिवसेना आणि कळवा मुंब्रा या ठिकाणी राष्ट्रवादी काँग्रेसचे वर्चस्व आहे. लोकसभा मतदार संघावर शिवसेनेचे वर्चस्व असून येथे भाजपाने आपली मोर्चेबांधणी करण्यास सुरुवात केली आहे.
भाजपच्या नव्या प्लॅनमुळे शिंदेंच्या शिवसेनेत प्रचंड अस्वस्थता; विश्वासात न घेताच मोठा निर्णय
शिवसेनेत दुफळी निर्माण झाल्यानंतर ठाकरे गटाचे माजी आमदार सुभाष भोईर हे ग्रामीण भागात सक्रीय झाल्याचे दिसतात. ठाकरे गटाकडून त्यांना कल्याण लोकसभा संपर्क प्रमुख पद देण्यात आले आहे. भोईर यांनी २०१४ साली विधानसभा निवडणूक लढवित विजय मिळवला होता. त्यानंतर २०१९ साली शिवसेनेकडून शेवटच्या क्षणी त्यांचे तिकीट रद्द करत रमेश म्हात्रे यांना तिकीट दिले गेले होते. यामुळे भोईर नाराज होते. ठाण्यातून भोईर यांना कायम डावलले जात असल्याची चर्चा होती. शिवसेनेत दुफळी निर्माण झाल्यानंतर भोईर यांना पुन्हा एकदा आपले वर्चस्व दाखविण्याची संधी निर्माण झाली आहे. ठाणे जिल्ह्यातील ग्रामीण भागात ठाकरे गटाचा एक चेहरा म्हणून उद्धव ठाकरे यांचे निकटवर्तीय असलेले भोईर यांच्याकडे पाहिले जात आहे
