पालघरः पालघर येथील औद्योगिक वसाहतीमध्ये असलेल्या नंडोलिया ऑरगॅनिक केमिकल कंपनीत संध्याकाळी सातच्या सुमारास मोठा स्फोट झाल्याची घटना घडली आहे. यात संदीप कुशवाह या कामगाराचा मृत्यू झाला, तर तीन कामगार जखमी झाले आहेत. या स्फोटाची तीव्रता ईतकी होती की सुमारे १५ किलोमीटरच्या परिसर स्फोटाच्या आवाजानं हादरला.

रासायनिक प्रक्रियेदरम्यान औद्योगिक वसाहतीमधील टी-१४१ प्लॉटमध्ये हा स्फोट झाला. सोलवेंट डिस्टिलेशन करणाऱ्या या कंपनीमध्ये रिअॅक्टरमध्ये भीषण स्फोट झाला. या स्फोटामुळं कंपनीत काम करणारे तीन कामगार जखमी झाले आहेत. जखमी झालेल्या कामगारांमध्ये मोहम्मद मोसिन अल्ताभ (वय – ३०), दिलीप गुप्ता (वय -२८) व उमेश कुशवाहा (वय -२२) या तिघांचा समावेश आहे.

या स्फोटाचा आवाज १५ किलोमीटर अंतरावर असलेल्या पालघर शहरात देखील प्रकर्षाने जाणवला. या स्फोटामुळे सालवड, पास्थळ, बोईसर, तारापूर व चिंचणी या किनारपट्टीची सर्व गावं हादरली व परिसरात मोठा धक्का जाणवला. या स्फोटानंतर निर्माण झालेली वायु दुर्गंधी देखील दूरवर येत होती.

वाचाः

स्फोटानंतर परिसरात वायु पसरल्याने तारापूर एमआयडीसी अग्निशामक दलाला शोध कार्य करण्यास अडथळे निर्माण झाले आहेत. बोईसर पोलीस घटनास्थळी पोहोचले. या स्फोटाच्या वेळी कंपनीमध्ये १४ कामगार होते व त्यापैकी १३ जणांचा शोध लागला असून तीन जण जखमी असल्याची माहिती पोलिसांकडून देण्यात आली आहे.

दरम्यान, अपघातग्रस्त कंपनीच्या बाजूच्या ल्युपींन या कंपनीच्या भागात स्फोटातील रिअॅक्टरच्या भागाचा चार फुटाचा मोठा तुकडा येऊन पडला. पंरतु, सुदैवाने त्यावेळी तिथं कोणीही काम करत नसल्यानं मोठी जीवितहानी टळली आहे.

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

LEAVE A REPLY

Please enter your comment!
Please enter your name here