म. टा. प्रतिनिधी, : पुणे महापालिकेच्या हद्दीत करोनाविरूद्ध लढण्यासाठी किती प्रमाणात अँटीबॉडी (प्रतिपिंड) विकसित झाल्या आहेत, याचा अंदाज घेण्यासाठी निवडक पाच प्रभागांमध्ये करण्यात आलेल्या सिरो सर्वेक्षणामध्ये सुमारे ५१.५० टक्के नागरिकांमध्ये अँटिबॉडी विकसित झाल्याचा निष्कर्ष काढण्यात आला आहे. शास्त्रज्ञांनी रक्ताच्या नमुन्याच्या आधारे केलेल्या अभ्यासानुसार अॅंटीबॉडी विकसित झाल्याचे प्रमाण हे सुमारे ३६.१ टक्के ते ६५.४ टक्क्यांपर्यंत सर्व प्रकारच्या निवासस्थानांमध्ये राहणाऱ्या व्यक्तींमध्ये दिसून आले आहे.

सावित्रीबाई फुले पुणे विद्यापीठ, भारतीय विज्ञान शिक्षण व संशोधन संस्था (आयआयएसईआर) फरिदाबाद येथील ट्रान्सलेशनल स्वास्थ्य आणि तंत्रज्ञान संस्था (टीएचएसटीआई आणि वेल्लोर येथील खिश्चन वैद्यकीय महाविद्यालय (सीएमसी) या संस्थांमधील संशोधक, वैज्ञानिक आणि साथीचे रोग विशेषज्ञ यांनी करोनाचा प्रसार झालेल्या कार्यक्षेत्रात करोनाच्या विषाणूविरुद्ध तयार होणाऱ्या प्रतिपिंडाच्या म्हणजे सेरोप्रिव्हलेन्सच्या व्याप्तीचा अंदाज घेण्यासाठी शास्त्रीय पद्धतीने सर्वेक्षण आणि अभ्यास केला आहे. त्यासाठी पर्सिस्टंट फाउंडेशन फाँडेशनने सुमारे ७५ लाख रुपयांचा निधी दिला आहे. या सर्वेक्षणातील निष्कर्षांची माहिती विभागीय आयुक्त सौरभ राव, प्रा. एल. एस. शशिधर, डॉ. अर्णव घोष, डॉ. आरती नगरकर यांनी पत्रकार परिषदेत दिली.

वाचाः

या सर्वेक्षणासाठी पुणे महापालिकेच्या प्रत्येक प्रभागांमधील एक जुलैपर्यंतची करोनाबाधित रुग्णांची संख्या विचारात घेऊन पाच प्रभाग निवडण्यात आले होते. त्यामध्ये कसबा पेठ-सोमवार पेठ, रास्तापेठ-रविवार पेठ, लोहियानगर-काशेवाडी, येरवडा आणि नवीपेठ-पर्वती या पाच प्रभागांचा समावेश होता. या पाच प्रभागांतील ६३ ठिकाणच्या एक हजार ६६४ व्यक्तींचे रक्ताचे नमुने गोळा करण्यात आले. २० जुलै ते पाच ऑगस्ट या कालाधीत हे सर्वेक्षण केले गेले. या अभ्यासात संकलित करण्यात आलेल्या रक्ताच्या नमुन्यातील अॅंटीबॉडी तपासण्यासाठी चाचण्या करण्यात आल्या. त्यामध्ये पाच प्रभागांमध्ये सरासरी ५१.५० टक्के नागरिकांमध्ये अँटीबॉडी विकसित झाल्याचे निदर्शनास आले आहे. सर्वाधिक अँटीबॉडी या लोहियानगर-काशेवाडी या प्रभागांमध्ये विकसित झाल्याचे आढळून आले आहे. हा झोपडपट्टी असलेला परिसर आहे. सर्वांत कमी प्रमाण हे कसबा पेठ-सोमवारपेठ या प्रभागात ३६.१ टक्के असल्याचे सर्वेक्षणातून स्पष्ट झाले आहे.

वाचाः

आणखी तीन सर्वेक्षण
‘या सर्वेक्षणानंतर आणखी तीन सर्वेक्षण करण्यात येत आहेत. ससून रुग्णालयाकडून पुण्याचे, तर वायसीएम रुग्णालय आणि डी. वाय. पाटील संस्थेकडून पिंपरी चिंचवड महापालिकेचे सर्वेक्षण करण्यात येत आहे. जिल्ह्याच्या ग्रामीण भागासाठीही सर्वेक्षण करण्याचा विचार आहे. या अहवालातील निष्कर्षाच्या आधारे प्रशासनाकडून पुढील नियोजन केले जाणार आहे’ असे विभागीय आयुक्त सौरभ राव यांनी सांगितले.

वाचाः

म्हणजे काय?

सिरो सर्वेक्षण याचा अर्थ रक्तद्रवाची तपासणी करणे. रक्तद्रव हा रक्ताचा पिवळ्या रंगाचा घटक असून, त्यामध्ये रक्तपेशी वगळता प्रथिने आणि अन्य घटक असतात. त्यामध्ये अँटीबॉडीचा समावेश असतो. या रक्तद्रवाची पाहणी केल्यानंतर कोणत्याही संसर्गजन्य रोगाविरोधात लढण्यासाठी तयार झालेल्या अँटीबॉडीचा अंदाज येत असतो. करोनाविरूद्ध विकसित झालेल्या अँटीबॉडी तपासण्यासाठी हे सर्वेक्षण करण्यात आले.

ठळक मुद्दे

स्वतंत्र शौचालयांची व्यवस्था असणाऱ्या घरांमधील प्रसार ४५.३ टक्के

सामायिक शौचालये वापरणाऱ्यांमध्ये प्रसार ६२.२ टक्के

बंगल्यांमध्ये राहणाऱ्या नागरिकांमध्ये प्रसाराचे प्रमाण ४३.९ टक्के

चाळ किंवा झोपडपट्टीत राहणाऱ्यांमध्ये राहणाऱ्या नागरिकांमध्ये प्रसाराचे प्रमाण हे अनुक्रमे ५६ टक्के आणि ६२ टक्के

अपार्टमेंटमध्ये राहणाऱ्या लोकांमध्ये प्रसाराचे प्रमाण तुलनेने कमी म्हणजे ३३ टक्के

अँटिबॉडीच्या व्याप्तीचे प्रमाण हे स्त्रियांमध्ये ५०.१ टक्के आणि पुरुषांमध्ये ५२.८ टक्के

६६ वर्षांपेक्षा जास्त वयोगटातील ज्येष्ठ नागरिकांमध्ये तुलनेने प्रसार कमी म्हणजे ३९.८ टक्के

Maharashtra News, Latest Maharashtra News in Marathi, ‎महाराष्ट्र ठळक बातम्या | Maharashtra Times

5 COMMENTS

  1. I always spent my half an hour to read this web site’s articles or reviews daily along with a mug of coffee.

  2. Like!! I blog quite often and I genuinely thank you for your information. The article has truly peaked my interest.

Leave a Reply to เบอร์สวยมงคล Cancel reply

Please enter your comment!
Please enter your name here