म. टा. प्रतिनिधी, पुणे : आयएमडीने वर्तवलेल्या अंदाजानुसार यंदा चार जूनला मान्सूनचे केरळमध्ये आगमन अपेक्षित होते. मात्र, तसे झालेले नाही. अरबी समुद्रात आता कमी दाबाच्या क्षेत्राची शक्यता वर्तवण्यात आल्याने पश्चिम किनारपट्टीवर मान्सूनची प्रगती वेगाने होऊ शकते, असे तज्ज्ञांचे म्हणणे आहे.

‘आयएमडी’ने शनिवारी वर्तवलेल्या अंदाजानुसार येत्या पाच जूनला आग्नेय अरबी समुद्रात वातावरणात चक्रीय स्थिती तयार होण्याची शक्यता असून, त्यापुढील ४८ तासांत तिथे कमी दाबाचे क्षेत्र तयार होऊ शकते. एका हवामानशास्त्रीय मॉडेलनुसार या कमी दाबाच्या क्षेत्राची तीव्रता वाढत जाऊन त्याचे चक्रीवादळात रूपांतर होऊ शकते.

अरबी समुद्रातील संभाव्य चक्रीवादळ पश्चिम किनारपट्टीला समांतर उत्तरेच्या दिशेने सरकण्याची प्राथमिक शक्यता दिसत असून, चक्रीवादळामुळे किनारपट्टीवर मोसमी वाऱ्यांचा जोर वाढू शकतो. वादळामुळे जूनच्या दुसऱ्या आठवड्यात किनारपट्टीवर सर्वदूर पाऊस होऊन मान्सूनची प्रगतीही वेगाने होऊ शकते, असे हवामानतज्ज्ञांचे म्हणणे आहे.

दरम्यान, केरळमध्ये मान्सूनसाठी अजूनही वातावरण अनुकूल नसून, आगमनासाठी अजून चार ते पाच दिवस लागतील, असे भारतीय हवामानशास्त्र विभागाने रविवारी सांगितले. केरळमध्ये मान्सूनचे दर वर्षी एक जूनला आगमन अपेक्षित असते. यंदा चार जूनला मान्सूनचे आगमन होण्याचा अंदाज वर्तविण्यात आला होता.

आरबी समुद्रात चक्रीवादळ?

आयएमडीने वर्तविलेल्या अंदाजानुसार यंदा ४ जूनला मान्सूनचे केरळमध्ये आगमन अपेक्षित होते. मात्र, तसे झालेले नाही. आणखी चार-पाच दिवस लागण्याचा अंदाज तज्ज्ञांनी वर्तविला आहे. ‘आयएमडी’ने शनिवारी वर्तविलेल्या अंदाजानुसार येत्या पाच जूनला आग्नेय अरबी समुद्रात वातावरणात चक्रीय स्थिती तयार होण्याची शक्यता असून, त्यापुढील ४८ तासांत तिथे कमी दाबाचे क्षेत्र तयार होऊ शकते. एका हवामानशास्त्रीय मॉडेलनुसार या कमी दाबाच्या क्षेत्राची तीव्रता वाढत जाऊन त्याचे चक्रीवादळात रूपांतर होऊ शकते. अरबी समुद्रातील संभाव्य चक्रीवादळ पश्चिम किनारपट्टीला समांतर उत्तरेच्या दिशेने सरकण्याची प्राथमिक शक्यता दिसत आहे.

पूर्वमोसमी पावसाची हजेरी

राज्याच्या बहुतेक भागांत रविवारी पूर्वमोसमी पावसाने हजेरी लावली. वादळी वारे आणि विजांच्या कडकडाटासह बहुतेक ठिकाणी पाऊस पडला. यामुळे अनेक ठिकाणी घरांचे, गोठ्यांचे नुकसान झाले असून, जनावरे दगावण्याचेही प्रकार घडले.

Weather Update: आठवड्याच्या पहिल्या दिवशी कसं असेल वातावरण, उद्याचं मुंबई-पुण्यातील हवामान अपडेट

नाशिक जिल्ह्यात पिकाचे नुकसान

नाशिक : नाशिक जिल्ह्यात सर्वत्र अचानक हवामानात बदल होऊन रविवारी वादळीवाऱ्यासह जोरदार पाऊस बरसला. सटाणा सोसाट्याच्या वाऱ्यामुळे अनेक भागात छतावरचे पत्रे उडाले, तर काही भागात व्यापाऱ्यांचा वाळत घातलेला मका ओला झाल्याने मोठे नुकसान झाले आहे.

वाशीम जिल्ह्यात गायीचा मृत्यू

वाशीम : वाशीम जिल्ह्यात रिसोड व मालेगाव तालुक्यात जोरदार पाऊस झाला. मालेगाव तालुक्यातील पिंपळशेंडा येथील बबन लठाड यांच्या गायीचा वीज पडून मृत्यू झाल्याची माहिती जिल्हा आपत्ती व्यवस्थापन अधिकारी यांनी दिली आहे. किन्हीराजा तसेच रिसोड तालुक्यातील मांगवाडी लगत मुख्य रस्त्यावर झाडे उन्मळून पडल्यामुळे रहदारीस काही काळ अडथळा निर्माण झाला होता.

Weather Alert: राज्यासाठी पुढचे ३-४ तास महत्त्वाचे; मुंबई, ठाण्यासह १२ जिल्ह्यांना IMD कडून पावसाचा इशारा
जालन्यात वादळाचा तडाखा

जालना : जिल्ह्यातील सर्वदूर भागासह शहरात वादळ,-वाऱ्याचा जोरदार तडाखा बसला. अनेक झाडे उन्मळून पडली घरांवरील पत्रे उडाली. नेटशेड असलेल्या फळबागांचे प्रचंड नुकसान झाले आहे रविवारी दुपारी एक वाजण्याच्या सुरुवातीला रिमझिम पाऊस सुरू झाला आणि त्यानंतर वादळी वाऱ्यासंह पाऊस झाला. वादळामुळे अनेक झाडे उन्मळून पडली. जिल्ह्यातील काही भागात शेतातील विद्युत पुरवठा करणारे खांब कोसळून पडल्याने वीज पुरवठा खंडित झाला.

वादळी वाऱ्या मुळे विद्युत वाहिनीच्या तारा तुटल्याने पैठण व अंबड तसेच जालना जलशुद्धीकरण केंद्र येथील विद्युत पुरवठा खंडित झाला नवीन जालना व जुना जालना भागामध्ये पाणीपुरवठा करण्याकरिता एक दिवसाचा विलंब होणार आहे अशी माहीती मुख्याधिकारी तथा प्रशासक संतोष खांडेकर यांनी दिली

‘समृद्धी’वरील वाहतूक दोन तास बंद

जालना : वादळी वाऱ्यांसह जिल्ह्यात झालेल्या मुसळधार पावसाचा फटका समृद्धी महामार्गावरील वाहतुकीलाही बसला. महामार्गावरील मोठी कमान कोसळल्याने वाहतूक दोन तास खोळबंली होती. त्याचा फटका वाहनधारकांना बसला. पोलिसांनी एका ट्रकच्या मदतीने कमान बाजूला करून वाहतूक सुरळीत केली.

डहाणू परिसरात पाऊस

डहाणू : डहाणू तालुक्यात रविवारी सकाळी सव्वा अकरा वाजण्याच्या सुमारास जोराचा वाऱ्यासह पाऊस झाला. त्यापूर्वी काही मिनिटे धुळीच्या वादळासारखी स्थिती निर्माण झाली होती. अचानक आलेल्या पावसामुळे वातावरणात गारवा आला असला, तरी नागरिकांची त्रेधातिरपीट उडाली. वाड्यातही पावसाने हजेरी लावली. साधारण अर्धा तास पाऊस झाला.

मुंबईत हलक्या सरी

मुंबई : मुंबईमध्ये रविवारी पावसाचा केवळ शिडकावा झाला. सोमवारीही हलक्या सरी पडतील अशी शक्यता प्रादेशिक हवामान विभागाने वर्तवली आहे. मात्र या हलक्या सरींमुळे तापमानात बदल नसल्याने मुसळधार पावसाच्या उपस्थितीची ओढ मुंबईकरांना लागली आहे.

मराठवाड्यात पूर्वमोसमी पाऊस

छत्रपती संभाजीनगर : जिल्ह्यात पूर्वमोसमी पावसाने रविवारी जोरदार हजेरी लावली. सोयगाव तालुक्यात वादळी वाऱ्यांसह गारपीट झाली. जिल्ह्यात पाच जनावरांचा वेगवेगळ्या दुर्घटनेत मृत्यू झाला आहे.

LEAVE A REPLY

Please enter your comment!
Please enter your name here