भुवनेश्वर: ओदिशातील बालासोरमध्ये तीन ट्रेन्सच्या भीषण अपघातात २७५ पेक्षा अधिक प्रवाशांचा मृत्यू झाला. या अपघातात जखमी झालेल्या प्रवाशांची संख्या हजारापेक्षा अधिक आहे. या अपघातानं अनेकांच्या आयुष्यावर तीव्र आघात झाला आहे. त्यांचं कधीही भरुन न निघणारं नुकसान झालं आहे. लेकीसह कोरोमंडल एक्स्प्रेसमधून निघालेले देब मात्र सुदैवी ठरले. लेकीच्या हट्टामुळे त्यांचा जीव वाचला.एम. के. देब त्यांच्या आठ वर्षीय मुलगी स्वातीसह शुक्रवारी संध्याकाळी कोरोमंडल एक्स्प्रेसनं निघाले. याच ट्रेनचा संध्याकाळी सातच्या सुमारास बालासोर जिल्ह्यात अपघात झाला. मुलीच्या हट्टामुळे या भीषण अपघातातून आपला जीव वाचेल, याची कल्पनाही देब यांनी केली नव्हती. बापलेक खडगपूरमध्ये एक्स्प्रेसमध्ये चढले. त्यांना कटकला उतरायचं होतं. शनिवारी त्यांची एका डॉक्टरकडे अपॉईंटमेंट होती. देब यांनी थर्ड एसी कोचची तिकिटं काढली होती. मात्र स्वातीनं खिडकीजवळ बसण्याचा हट्ट धरला.
अरेरे! १२ तासांपासून वडील मृतदेहांमधून वाट काढताहेत, लेकाला शोधताहेत; हृदयद्रावक कहाणी
‘आमच्याकडे विंडो सीटचं तिकीट नव्हतं. त्यामुळे आम्ही टीसीशी संपर्क साधला. शक्य असल्यास अन्य प्रवाशांसोबत सीट बदलून घ्या, असा सल्ला त्यांनी दिला. आम्ही दुसऱ्या डब्यात गेलो. तिथल्या दोघांना विनंती केली. त्यांनी सीट बदलण्याची तयारी दर्शवली. ते आमच्या डब्यात जाऊन बसले. आम्ही त्यांच्या डब्यात जाऊन त्यांच्या सीटवर बसलो. त्या सीट तीन रेक दूर होत्या,’ असं खडगपूरमध्ये सरकारी कर्मचारी असलेल्या देब यांनी सांगितलं.
ट्रेन तिरपी झाली, प्रवासी एकमेकांवर पडले; रेल्वे अपघातातील महिला प्रवाशानं सांगितली आँखोदेखी
देब यांनी सीट बदल्यानंतर काही वेळातच ट्रेनला भीषण अपघात झाला. यात २७५ पेक्षा अधिक जणांनी जीव गमावला. देब त्यांच्या लेकीसह ज्या डब्यात बसले होते, त्या डब्याला अपघातात काहीच झालं नाही. त्यामुळे सगळेच प्रवासी वाचले. मात्र देब आणि त्यांची मुलगी स्वाती ज्या ठिकाणी आधी बसले होते, त्या डब्याचं अपघातात मोठं नुकसान झालं. त्यातील अनेकांचा अपघातात जीव गेला.

‘माणुसकीचा झरा’; रेल्वे अपघातानंतर रक्तदानासाठी लोकांची रांग

आम्ही दोन प्रवाशांना विनंती केली होती. त्यांनी आमची विनंती मान्य केली आणि त्यांची आसनं आम्हाला दिली. ते दोन प्रवासी आमच्या आसनांवर जाऊन बसले. अपघातानंतर त्यांच्याबद्दल आम्हाला काहीच समजलं नाही. ते दोघे सुखरुप असावेत यासाठी आम्ही प्रार्थना करतो. आमचा जीव केवळ चमत्कारामुळे वाचला. त्यासाठी आम्ही देवाचे आभार मानतो, असं देब म्हणाले.

LEAVE A REPLY

Please enter your comment!
Please enter your name here