खार परिसरात सेठ इदरसल वरदमल ही धर्मशाळा असून यातील एका १६ वर्षीय मुलीचा तिच्या भावासोबत मोबाइलवरून वाद झाला. या भांडणाचा राग मनात धरून या मुलीने स्वतःच्या हाताच्या नसा ब्लेडने कापल्या. साठ ते आठ वेळा अनेक ठिकाणी ब्लेडने कापण्यात आल्याने तिच्या हातामधून खूप रक्तस्राव होऊ लागला. धर्मशाळेतून कुणीतरी ही घटना खार पोलिस ठाण्यात फोनद्वारे कळवली. खार पोलिस ठाण्याचे पीटर ऑपरेटर इंदुलकर यांनी घटनेचे गांभीर्य लक्षात घेऊन ही माहिती निर्भया पथकाला दिली. निर्भया पथकातील महिला कॉन्स्टेबल म्हात्रे यांच्यासह चंद्रकांत तेरवणकर, माधुरी मजवेलकर आणि विशाल घार्गे हे घटनास्थळी पोहोचले. बरेच रक्त वाया गेल्यामुळे मुलगी बेशुद्ध पडली होती. म्हात्रे यांनी तिला हातावर उचलून घेतले आणि पहिल्या मजल्यावरून खाली आणले. तेथून जवळपास १०० मीटरपर्यंत उचलून नेत पोलिसांच्या वाहनात ठेवले.
राज्य मंत्रिमंडळाच्या विस्ताराच्या चर्चा, उत्तर महाराष्ट्रातून शिंदे फडणवीसांच्या टीममध्ये कुणाला संधी?क्षणाचाही विलंब न करता पोलिस वाहनातून या मुलीला भाभा रुग्णालयात नेण्यात आले. डॉक्टरांनी तिच्यावर तत्काळ उपचार सुरू करून प्रथम रक्तस्राव थांबवला. वेळीच उपचार मिळाल्याने आणि रक्तस्राव थांबल्याने मुलीला शुद्ध आली. पोलिसांच्या तत्परतेमुळे या मुलीचे प्राण वाचविण्यात डॉक्टरांना यश आले. खार पोलिसांच्या विशेषतः म्हात्रे यांनी केलेल्या कामगिरीचे सगळीकडे कौतुक केले जात आहे. म्हात्रे यांनी काही दिवसांपूर्वी अशीच एका महिलेचीही मदत केली होती. पोलिस सहआयुक्त सत्यनारायण चौधरी यांनी प्रशस्तीपत्रक देऊन खार निर्भया पथकाचा गौरव केला.
