अरेच्चा! महिलेने लाच म्हणून चक्क म्हैस दिली

सीधी: सरकारी कार्यालयात कामाची अडवणूक झाल्यावर काहीजण देण्याचे काम करतात. तर, काहीजण तक्रार करतात. मात्र, काहीजण लाच देण्याचा भन्नाट मार्ग अवलंबत लाचखोर अधिकाऱ्यांना उघडं पाडण्याचा प्रयत्न करतात. मध्य प्रदेशमधील सीधी जिल्ह्यात एका महिलेने लाच म्हणून चक्क म्हशीला तहसीलदार कार्यालयात नेले. लाच म्हणून या म्हशीलाच स्वीकारा असा आग्रहही तिने केला.

गांधीगिरीचा पर्याय अवलंब करणाऱ्या महिलेचे नाव रामकली पटेल असे आहे. रामकलीला आपल्या वडिलोपार्जित संपत्तीमध्ये नाव बदलायचे होते. त्यासाठी संबंधित अधिकाऱ्याने तिच्याकडे १० हजार रुपयांच्या लाचेची मागणी केली होती. एवढी रक्कम तिने त्या अधिकाऱ्याला दिल्यानंतर तिच्याकडे आणखी रक्कमेची मागणी करण्यात आली. त्यानंतर लाच देण्यासाठी रोख रकम नसल्याचे सांगत तिने म्हैशीचा स्वीकार लाच म्हणून करण्यास सांगितले. रामकली या पावित्र्याने तहसीलदार कार्यालयात खळबळ उडाली.

तहसीलदारांचे स्पष्टीकरण

तहसीलदार मायकल टिर्की यांनी रामकली हीने लाच देण्यासाठी म्हैस आणली असल्याचे मान्य केले आहे. रामकली पटेल यांचे काम १४ नोव्हेंबर रोजीच झाले आहे. मी त्यांना त्या आदेशाची एक प्रतही दिली असल्याचे त्यांनी सांगितले. दरम्यान, सब डिव्हीजन मॅजिस्ट्रेट आर. के. सिन्हा यांनी सांगितले की, हा प्रकार एका षडयंत्राचा भाग आहे. काही लोकांनी रामकलींना भडकवले असल्याचे त्यांनी सांगितले.