मागील काही दिवसांपासून मुख्यमंत्री यांच्या कार्यक्रमांकडे सार्वजनिक बांधकाम मंत्री रवींद्र चव्हाण पाठ फिरवत आहेत. कालच्या दिव्यातील कार्यक्रमाला ते उपस्थित नव्हते. मुख्यमंत्री एकनाथ शिंदे यांच्या खासदार सुपुत्राकडून भाजप कार्यकर्त्यांची कामे अडविण्याच्या, त्यांना अडचणीत आणण्याच्या, मंत्री रवींद्र चव्हाण यांना पाण्यात पाहण्याच्या सुप्त हालचालींमुळे ठाणे जिल्ह्यातील भाजप पदाधिकारी, कार्यकर्त्यांमध्ये कमालीची अस्वस्थता आहे. दरम्यान आजच्या बैठकीतील पदाधिकाऱ्यांचा संताप पाहता शिवसेना-भाजप मधील दरी खूपच वाढल्याचे स्पष्ट झाले आहे.
श्रीकांत शिंदेंच्या भाषणावेळी शॉक लागून नागरिकाचा मृत्यू, भाजप पदाधिकाऱ्याचा गंभीर आरोप, रमाकांत मढवी गोत्यात?दरम्यान याबाबत सार्वजनिक बांधकाम मंत्री रवींद्र चव्हाण यांनी सांगितले की, आजच्या पदाधिकाऱ्यांच्या बैठकीत वरिष्ठ पोलीस निरीक्षक शेखर बागडे यांच्या बदली बाबत मागणी केली आहे. याबाबत त्यासंदर्भात वरिष्ठांशी बोलेन, बदली होणार नाही तोपर्यंत युती करणार नाही, असा ठराव झाला. मात्र त्याबाबत कार्यकर्त्यांची समजूत घातली पाहिजे ती घालू असे रवींद्र चव्हाण यांनी सांगितले.
कल्याणमधील भाजपच्या बैठकीत नेमकं काय ठरलं?
मुख्यमंत्री एकनाथ शिंदे यांच्या निकटवर्तीयांकडून आलेल्या दबावामुळे भाजपचे डोंबिवली पूर्व विभागाचे अध्यक्ष नंदू जोशी यांच्याविरोधात गुन्हा दाखल करण्यात आला, असा भाजपच्या स्थानिका नेत्यांचा आरोप आहे. नंदू जोशी यांच्यावर गुन्हा दाखल झाल्यापासून शिवसेना आणि भाजपमधील धुसफूस वाढत चालली होती. या पार्श्वभूमीवर कल्याण लोकसभा मतदारसंघातील पदाधिकाऱ्यांची तातडीची बैठक गुरुवारी सकाळी झाली. या बैठकीला सार्वजनिक बांधकाम मंत्री रवींद्र चव्हाण यांच्यासह पक्षाचे प्रमुख नेते, आमदार, पदाधिकारी उपस्थित होते. या बैठकीत खासदार श्रीकांत शिंदे यांना सहकार्य करायचे नाही, अशी जाहीर भूमिका यावेळी घेण्यात आली. राज्याचे गृहमंत्रीपद भाजपकडे असतानाही एका नेत्याच्या दबावामुळे पदाधिकाऱ्यांवर गुन्हा दाखल होत असेल तर सत्ता काय कामाची, असा सवाल भाजपच्या पदाधिकाऱ्यांनी उपस्थित केला.
तसेच कल्याण लोकसभा मतदारसंघात भाजप कार्यकर्ते सांगतील तोच उमेदवार मान्य केला जाईल. अन्य कोणी उमेदवार सहन केला जाणार नाही, अशी आक्रमक भूमिका भाजपच्या स्थानिक नेत्यांनी, पदाधिकाऱ्यांनी घेतली आहे. त्यामुळे आता यावर एकनाथ शिंदे, श्रीकांत शिंदे यांच्यासह शिवसेनेचे स्थानिक नेते काय भूमिका घेतात ते पाहावे लागेल.
