पाच वर्षांची मुलगी मीना (बदललेले नाव) ही मनोरुग्ण आईसोबत मानखुर्दमध्ये येथे मावशीच्या घरी राहत होती. वडिलांना कॅन्सर असल्याने त्यांच्यावर राजकोट येथे उपचार सुरु आहेत. २ जून रोजी मीना आईसोबत घरातून निघाली. आई घरी परतली मात्र मीना घरी न आल्याने ४ जून रोजी तिच्या मावशीने मानखुर्द पोलिस ठाण्यात तक्रार केली. मुलगी अल्पवयीन असल्याने पोलिसांनी अपहरणाचा गुन्हा दाखल केला. आईच्या मानसिक स्थितीचा गैरफायदा घेत कुणातरी अपहरण केल्याचा अंदाज असल्याने गुन्हे शाखा युनिट ६चे प्रभारी पोलिस निरीक्षक रवींद्र साळुंखे यांच्या मार्गदर्शनाखाली निरीक्षक प्रशांत पवार, हनुमंत ननावरे, प्रवीण बांगर, सहायक निरीक्षक अर्चना कुदळे, उपनिरीक्षक संदीप रहाणे, सुभाष मुठे, नंदकुमार बेळणेकर यांची सहा पथके तयार करून त्यांच्याकडे वेगवेगळी जबाबदारी देण्यात आली. परीसरातील खासगी व शासकीय सीसीटीव्ही फुटेजची बारकाईने पाहणी करण्यात आली.
Mumbai Crime : राज्याला हादरवून टाकणाऱ्या वसतिगृहातील तरुणीच्या हत्येप्रकरणी गंभीर बाब समोर
मुलीचे फोटो खबऱ्यांपर्यत पोहोचविण्यात आली. परीसरातील रहिवाशांना दाखवून मुलीचा शोध घेण्याचा कसोशीने प्रयत्न करण्यात आला. मुंबईतील विविध पोलिस ठाण्यांशी संपर्क करून गुन्हा घडलेल्या कालावधीमध्ये अल्पवयीन मुलींच्या संदर्भातील दाखल अपमृत्यू प्रकरणे, खून अशा गुन्ह्यांची माहीती घेण्यात आली. त्याचप्रमाणे तसेच रेल्वे स्थानक परिसर, रेल्वे नियंत्रण कक्ष यांच्याशी संपर्क करून मीनाबाबत विचारणा करण्यात आली.
मीना हिचा काहीच थांगपत्ता लागत नसल्याने अखेर मुंबईतील मुलींसाठी असलेल्या विविध बालगृहांमध्ये तिचा शोध घेतला. जवळपास ३६ तासांच्या अविश्रांत शोधमोहिमेनंतर माटुंगा येथील श्रद्धानंद बालगृहात मीना सापडली. धारावी पोलिसांना मीना सापडल्याने, त्यांनी तिला त्या बालगृहात सोडले होते.
