आषाढी वारीच्या पार्श्वभूमीवर पंढरीची वारी- शासन आपल्या दारी या उपक्रमांनिमित्त जिल्ह्यातील सर्व दिंडी प्रमुखांशी पालकमंत्री विखे यांनी संवाद साधला. त्यानंतर माध्यमांशी बोलताना जिल्ह्यातून जाणाऱ्या सर्व दिंड्यांविषयी केलेल्या उपाययोजनाची माहिती त्यांनी दिली. त्यानंतर काही राजकीय मुद्द्यांवरही त्यांनी भाष्य केले.
राहाता तालुक्यातील गणेश सहकारी साखर कारखान्याच्या निवडणुकीत कोल्हे व थोरात यांचे संयुक्त पॅनल विखेंविरोधात उभे आहे, तसेच काही दिवसांपूर्वी आ. प्रा. राम शिंदे यांनीही विखे सहकार्य करीत नसल्याने नाराजी व्यक्त केली होती, या पार्श्वभूमीवर या संदर्भातील प्रश्नावर बोलताना विखे म्हणाले, स्थानिक सहकारी संस्थांच्या निवडणुकांतील विरोधकांचा मी फारसा विचार करीत नाही, त्याचे फारसे गांभीर्यही नाही. मात्र, आमदार राम शिंदे यांनी आमच्या संदर्भात जे काही मुद्दे उपस्थित केले होते, त्या संदर्भात त्यांच्याशी बोलणे झालेले आहे व चर्चाही झाली आहे. पुण्यश्लोक अहिल्यादेवी जयंती सोहळ्यात आम्ही एकत्र होतो. त्यामुळे त्यांचे सर्व समज-गैरसमज दूर झाले आहेत व आमच्या दृष्टीने तो विषय आता संपलेला आहे, असे त्यांनी स्पष्ट केले.
राष्ट्रवादीचे अमोल कोल्हे मनसे नेते वसंत मोरेंच्या घरी, राजकीय वर्तुळात चर्चा तर होणारच!
ज्येष्ठ नेते शरद पवार यांना ट्विटरवरून आलेल्या धमकी संदर्भात बोलताना पालकमंत्री विखे म्हणाले, राज्य सरकारने हा विषय गांभीर्याने घेतला आहे व त्याबाबत चौकशी सुरू आहे. धमकी देणाऱ्याचा शोध सुरू आहे. मात्र, संजय राऊत यांच्या धमकीसंदर्भात बोलायचे तर मात्र ते स्वतःच स्वतःला धमकी देत असावेत असे मिश्किल भाष्य विखे यांनी केले.
पवारांना धमकी देणाऱ्याचं नाव-गाव समजलं, भाजप कार्यकर्ता असल्याचा ट्विटरवर उल्लेख
जातीय तणाव व दंगलीमागे कोणत्या शक्ती आहेत, याचा शोध सरकार घेत आहे. सरकारच्या बदनामीचे षडयंत्र तर सुरू नाही ना, हेही या तपासातून स्पष्ट होईल, असा दावा करून विखे म्हणाले, देशात विरोधकांची तिसरी-चौथी व आणखी कितीही आघाड्या झाल्या तरी तो शिळ्या कढीला ऊत असेल. २०२४ मध्ये पंतप्रधान नरेंद्र मोदी यांचा विश्वनेता म्हणून गौरव होईल व त्या निवडणुकीत भाजपला न भूतो न भविष्यती यश मिळेल, असा दावाही विखे यांनी केला.
औरंगजेबाचे फोटो झळकावणाऱ्याना मोका
औरंगजेबाचे फोटो नाचवणाऱ्यांवर कडक कारवाई होणार आहे. कोणालाही पाठीशी घातले जाणार नाही. औरंगजेबाचे फोटो दाखवणाऱ्यांना येथे थारा नाही, त्यांना आवश्यक ते शासन कायद्यानुसार होईल. प्रसंगी गरज पडली तर या सर्वांविरुद्ध मोका कायद्यान्वये कारवाई केली जाईल. अशांबद्दल कोणतीही सहानुभूती शासन दाखवणार नाही, असेही विखे यांनी आवर्जून स्पष्ट केले
