म. टा. खास प्रतिनिधी, मुंबई : महाराष्ट्र काँग्रेसमध्ये लवकरच बदलाचे वारे वाहणार असल्याची चर्चा सुरू असतानाच शुक्रवारी मुंबई काँग्रेसचे अध्यक्ष भाई जगताप यांचा मुंबई काँग्रेस कार्यालयासमोरील सभागृहात असंघटित कामगारांचा जाहीर मेळावा सुरू असतानाच त्यांना पदावरून हटविण्याचा निर्णय अखिल भारतीय काँग्रेस समितीने जाहीर केला. जगताप यांच्या जागी काँग्रेसच्या माजी मंत्री आणि आमदार वर्षा गायकवाड यांची नियुक्ती करण्यात आली आहे. आगामी निवडणुका लक्षात घेता हा निर्णय महत्त्वपूर्ण मानला जात असून पक्षाने निवडणुकीपूर्वीच भाकरी फिरविल्याची चर्चा सुरू झाली आहे.

काँग्रेसचे राष्ट्रीय अध्यक्ष मल्लिकार्जुन खर्गे यांनी हा निर्णय घेतला असून राष्ट्रीय सरचिटणीस के. सी. वेणुगोपाल यांनी याबाबत पत्रक काढून घोषणा केली. मुंबई काँग्रेसच्या नियुक्तीबरोबरच गुजरातच्या अध्यक्षपदी शक्तीसिंह गोहिल, पुद्दुचेरीच्या अध्यक्षपदी व्ही. व्हेथिलिंगम यांची नियुक्तीही जाहीर करण्यात आली आहे. आगामी मुंबई महापालिका, लोकसभा आणि त्यानंतर विधानसभा निवडणुकांच्या पार्श्वभूमीवर काँग्रेसने हा महत्त्वाचा बदल केला आहे. महिला व दलित समाजात असणारा पाठिंबा, राज्य सरकारमध्ये विविध मंत्रीपदावर काम करण्याचा अनुभव या वर्षा गायकवाड यांच्या जमेच्या बाजू असून त्यामुळेच त्यांना संधी देण्यात आली असल्याचे बोलले जाते.

वर्षा गायकवाड उच्चशिक्षित असून दलित समाजातील आहेत. धारावी या मतदारसंघावर त्यांचे गेली अनेक वर्षे वर्चस्व आहे. राज्यातील मंत्रीमंडळात त्यांनी शिक्षणमंत्री म्हणून काम केलेले आहे. दलित समाजात त्यांना चांगला जनाधार आहे. तसेच इतर राज्यांमधील निवडणुकांमध्ये पक्षाच्या निरीक्षक म्हणून त्यांनी अनेकदा जबाबदाऱ्या सांभाळल्या आहेत. मुंबईत काँग्रेसला जनाधार मिळवून देणे, आघाडीतील इतर पक्षांच्या नेत्यांसोबत समन्वय राखणे आणि काँग्रेस पक्षाच्या जागा वाढविण्याचे मोठे आव्हान वर्षा गायकवाड यांना आगामी काळात पेलावे लागणार आहे.

मुंबई काँग्रेसमध्ये मोठे बदल; भाई जगतापांची उचलबांगडी, अध्यक्षपदी वर्षा गायकवाडांची नियुक्ती
वर्षा गायकवाड यांचा परिचय

– काँग्रेसचे ज्येष्ठ नेते आणि मुंबई अध्यक्ष एकनाथ गायकवाड यांची मुलगी.

– एमसीसी बीएडपर्यंत शिक्षण.

– २००९, २०१४ व २०१९ या विधानसभा निवडणुकीत धारावी मतदारसंघातून निवडून आलेल्या काँग्रेसच्या आमदार.

– २००९च्या आघाडी सरकारच्या काळात वैद्यकीय शिक्षण, उच्च व तंत्र शिक्षण, पर्यटन आणि विशेष साहाय्य या विभागाचे राज्यमंत्री भूषिवले.

– २० नोव्हेंबर २०१० ते ७ नोव्हेंबर २०१४ या काळात महिला व बालविकासमंत्री आणि हिंगोलीचे पालकमंत्री म्हणून काम केले.

महिलांची बदनामी करणं बंद कर नाहीतर; चित्रा वाघ यांचा आव्हाडांना इशारा

– २०१९मध्ये महाविकास आघाडी सरकारमध्ये शालेय शिक्षणमंत्री आणि हिंगोलीचे पालकमंत्रिपद भूषिवले.

– विधिमंडळाच्या विविध समित्यांवर काम केले आहे.

– २००६-२००७मध्ये उत्कृष्ट संसदपटू म्हणून गौरव, तर २०१५-१६मध्ये विधिमंडळातील राष्ट्रकुल संसदीय मंडळातर्फे उत्कृष्ट भाषण पुरस्कार.

– मुंबई काँग्रेसच्या वरिष्ठ उपाध्यक्षपदाची भूमिका नेटाने बजावली. त्याशिवाय महाराष्ट्र प्रदेश कार्यकारी समितीत सदस्य म्हणूनही त्यांनी काम केले आहे.

– सन २०१८मध्ये अखिल भारतीय काँग्रेस समितीच्या सचिवपदी त्यांची नियुक्ती करण्यात आली होती.

LEAVE A REPLY

Please enter your comment!
Please enter your name here