आगामी कल्याण लोकसभा निवडणुकीसाठी भाजप कार्यकर्ते म्हणतील तोच उमेदवार निवडण्यात यावा. तसेच भाजप पदाधिकाऱ्यावर विनयभंगाचा गुन्हा दाखल केलेले मानपाडा पोलीस ठाण्याचे सक्तीच्या रजेवर पाठविण्यात आलेले वरिष्ठ पोलीस निरीक्षक शेखर बागडे यांना निलंबित केले जात नाही, तोपर्यंत शिवसेनेला (शिंदे गट) कोणतेही सहकार्य न करण्याचे भाजपने ठरवले आहे. त्यांच्या कार्यक्रमांवर बहिष्कार टाकण्याचा निर्धार कल्याण पूर्वेतील भाजपच्या विशेष मंथन बैठकीत करण्यात आला. त्यामुळे कल्याण लोकसभेत भाजप विरुद्ध शिवसेना (शिंदे गट) असे चित्र दिसू लागले आहे. मागील काही दिवसांपासून मुख्यमंत्री एकनाथ शिंदे यांच्या कार्यक्रमांकडे भाजप नेते आणि सार्वजनिक बांधकाम मंत्री रवींद्र चव्हाण पाठ फिरवत आहेत.

दिव्यातील कार्यक्रमाला रवींद्र चव्हाण उपस्थित नव्हते. भाजप कार्यकर्त्यांची कामे अडविणे, त्यांना अडचणीत आणणे तसेच मंत्री चव्हाण यांना पाण्यात पाहण्याच्या सुप्त हालचाली खासदार श्रीकांत शिंदेंकडून सुरू असल्याचा भाजपचा आरोप आहे. त्यामुळे चव्हाण यांच्यासह ठाणे जिल्ह्यातील भाजप पदाधिकारी, कार्यकर्त्यांमध्ये कमालीची अस्वस्थता आहे. दरम्यान नुकत्याच झालेल्या भाजपच्या बैठकीतील पदाधिकाऱ्यांचा संताप पाहता शिवसेना-भाजपमधील दरी खूपच वाढल्याचे दिसत आहे.
कोल्हापुरातील राड्यामुळे १ हजार कोटी पंचगंगेत बुडाले; इंटरनेट बंदमुळे पाहा किती झालं नुकसान

दरम्यान, याबाबत सार्वजनिक बांधकाम मंत्री रवींद्र चव्हाण यांनी सांगितले की, ”आमच्या पदाधिकाऱ्यांच्या बैठकीत वरिष्ठ पोलीस निरीक्षक शेखर बागडे यांच्या बदलीबाबत मागणी केली आहे. त्यासंदर्भात मी वरिष्ठांशी बोलेन, बदली होणार नाही तोपर्यंत युती करणार नाही, असा ठराव झाला. मात्र कार्यकर्त्यांची समजूत घातली पाहिजे, ती आम्ही घालू असे त्यांनी सांगितले.
खासदार शिंदेंकडून भाजपला प्रत्युत्तर

भाजपच्या टीकेवर उत्तर देताना खासदार श्रीकांत शिंदेंनी म्हटले की, ”२०२४ साली नरेंद्र मोदींना पुन्हा या देशाच्या पंतप्रधानपदी विराजमान करण्याचा आमचा आणि देशातील तमाम जनतेचा निर्धार आहे. त्यासाठी आम्ही प्राणपणाने प्रयत्न करू. परंतु, काही क्षुल्लक कारणांसाठी शिवसेना भाजप युतीमध्ये मिठाचा खडा टाकण्याचे स्वार्थी राजकारण डोंबिवलीतल्या काही नेत्यांकडून सुरू आहे. मला कोणत्याही पदाची लालसा नाही. युतीमध्ये जर विघ्न निर्माण होत असेल तर माझी पदाचा राजीनामा देण्याची तयारी आहे.”

कल्याण लोकसभा आता कोण लढवणार?

कल्याण हा लोकसभा मतदारसंघ शिवसेनेचा बालेकिल्ला असून तो अबाधित ठेवण्यासाठी शिंदे आणि ठाकरे गटाकडून प्रयत्न सुरू आहेत. शिंदे गट व भाजपची युती असल्याने या मतदारसंघावर भाजपने दावा सांगितल्यास सध्याचे विद्यमान खासदार डॉ. शिंदे हे ठाण्यातून निवडणूक लढवून भाजपला ही जागा देण्याची शक्यता आहे. तर दुसरीकडे केंद्रीय मंत्री आणि भाजपचे खासदार अनुराग ठाकूर यांनी दोनदा कल्याण लोकसभेचा दौरा केला. त्यामुळे ही जागा भाजप लढवू शकते अशी चर्चा असून डोंबिवलीतील भाजपचे विद्यमान आमदार आणि मंत्री रविंद्र चव्हाण यांना उमेदवाऱी दिली जाऊ शकते असे राजकीय जाणकारांचे मत आहे.

संजय राऊतांना आलेल्या धमकीची दखल घेण्याची गरज नाही; राधाकृष्ण विखे-पाटलांनी डिवचलं

या मतदारसंघावर भाजपने आपले लक्ष केंद्रीत केल्यानंतर महाविकास आघाडीने देखील या ठिकाणी चाचपणी करण्यास सुरुवात केली आहे. भाजपकडून खासदार श्रीकांत शिंदे यांच्या कल्याण लोकसभा मतदारसंघावर दावा करण्यात आल्याच्या चर्चा काही दिवसांपासून रंगल्या होत्या. याबाबत बोलताना खासदार शिंदे यांनी भाष्य करताना म्हटलं की, ”कल्याण लोकसभा मतदारसंघात भाजप उमेदवार उभा करणार असे कोण म्हणालं त्याचं नाव घ्या. भाजप नेत्यांचे जे लोकसभानिहाय दौरे आहेत, ते केंद्राकडून देण्यात आले आहेत. त्यापासून आम्हाला काही त्रास नाही, प्रत्येक पक्षाला आपली पक्ष संघटना बांधण्याचा अधिकार आहे. भाजप त्यांची पक्ष संघटना बांधतेय. जिथे जिथे शिवसेनेचे खासदार आहेत त्या ठिकाणी शिवसेनेचेच खासदार निवडणूक लढवणार, हे केंद्राच्या आणि राज्याच्या नेतृत्वाकडून स्पष्ट करण्यात आले,” असे शिंदे म्हणाले.

अनुराग ठाकूर काय म्हणाले?

कल्याण लोकसभा मतदारसंघाच्या जागावाटपाबद्दल बोलताना अनुराग ठाकूर यांनी प्रतिक्रिया दिली आहे. ”हे तुम्ही किंवा मी ठरवू शकत नाही. पक्षाचे वरिष्ठ नेते ठरवतील. ती वेळ २०२४ मध्ये येईल, आता ती वेळ नाही. जर आम्ही सगळी कामं आणि विकास एकत्र करत आहोत, तर हा निर्णय सुद्धा एकत्र बसून घेतला जाईल,” असे ठाकूर म्हणाले.

LEAVE A REPLY

Please enter your comment!
Please enter your name here