पुणेकरांनो सावधान! वॉकसाठी घरबाहेर पडताय? मग हे वाचा

म. टा. प्रतिनिधी, पुणेः वॉकसाठी घराबाहेर पडणाऱ्या ज्येष्ठ नागरिक महिलांना लुटण्याचे प्रकार पुन्हा सुरू झाले आहेत. सकाळी फिरण्यासाठी बाहेर पडलेल्या ज्येष्ठ नागरिक असलेल्या महिलेच्या गळ्यातील ७० हजार रुपये किंमतीचे सोन्याचे मंगळसूत्र चोरून नेले. दुचाकीवरून आलेल्या चोरट्यांनी हिसका मारून मंगळसूत्र चोरले.

याबाबत एका ७८ वर्षीय ज्येष्ठ महिलेला तक्रार दिली असून त्यावरून अलंकार पोलिस स्टेशनमध्ये अज्ञात चोरट्या विरोधात गुन्हा दखल करण्यात आला आहे. एरंडवणा भागातील गल्ली नंबर चार भरत गुंज सोसायटी येथे हा प्रकार घडला. तक्रारदार महिला बुधवारी सायंकाळी सव्वा सातच्या सुमारास त्यांच्या बंगल्यासमोर असलेल्या लेन मध्ये फिरत होत्या. त्यावेळी दुचाकीवरून आलेल्या चोरट्याने हिसका मारून त्यांच्या गळ्यातील मंगळसूत्र चोरून नेले, अशी माहिती पोलिसांनी दिली.

गेल्या काही दिवसांपासून मॉर्निंग वॉक तसेच सायंकाळी पाय मोकळे करण्यासाठी घराबाहेर पडणाऱ्या ज्येष्ठ नागरिकांना लक्ष्य केले जात आहे. काही दिवसांपूर्वी संध्याकाळच्या सुमारास रस्त्यावर फिरत असलेल्या ज्येष्ठ महिलांना लुटण्याचे प्रकार समोर आले होते. या भागात सुरक्षिततेच्या कारणास्तव लावण्यात आलेल्या सीसीटिव्ही कॅमेरे यांची मदत घेऊन पोलिस तपास करत आहेत, मात्र यामध्ये यश मिळत असल्याचे दिसत नाही. या प्रकरणाचा पुढील तपास पोलिस उपनिरीक्षक सूरज गोरे हे करत आहेत.