goodreturs या वेबसाईटनुसार आज शनिवारी मुंबईत २२ कॅरेट सोन्याचा भाव ५०९९० रुपये आहे. तर २४ कॅरेट भाव ५१९९० रुपये आहे. दिल्लीत २२ कॅरेटसाठी सोने दर ५१३१० रुपये असून २४ कॅरेटसाठी तो ५५९६० रुपये आहे. कोलकात्यात सोन्याचा २२ कॅरेट साठी ५२५३० रुपये असून २४ कॅरेटसाठी ५५२५० रुपये आहे. चेन्नईमध्ये सोने २२ कॅरेटसाठी ५०८५० रुपये असून २४ कॅरेट ५५४७० रुपये आहे.
जागतिक बाजारात सोन्याचा भाव प्रती औंस २००० डॉलरपार गेला आहे. सार्वकालीन उच्चांकावर असलेल्या सोन्यात नफावसुली होताना दिसत असल्याचे अँजेल ब्रोकिंगचे उपाध्यक्ष अनुज गुप्ता यांनी सांगितले. अमेरिका आणि चीनमधील व्यापारी संघर्षाने पुन्हा डोकेवर काढले आहे. यामुळे कमॉडिटी बाजारावर आणखी काही काळ दबाव राहील. मात्र यूएस बॉण्ड यिल्ड आणि डॉलरचे अवमूल्यन सोन्याच्या किंमती वाढण्यास पोषक ठरतील, असे त्यांनी सांगितले.
अबन ग्रुपचे संस्थापक अध्यक्ष अभिषेक बन्सल यांच्या मते अमेरिकेतील बरोजगारीची ताजी आकडेवारी आणि अमेरिका-चीन आणि इराणमधील घडामोडी सोन्याच्या किमतींवर परिणाम करत आहेत. नजिकच्या काळात सोने १९८० डॉलर ते २०३७ डॉलर प्रती औंसच्या दरम्यान राहील, असा अंदाज बन्सल यांनी व्यक्त केला.
सराफांच्या मते, सोने सध्या ५२००० रुपयांच्या आसपास आहे, मात्र अर्थव्यवस्था हळूहळू पूर्वपदावर येत आहे. दिवाळीपर्यंत त्यात सुधारणा झाली तर सोन्याच्या किंमतीत बदल दिसून येईल. मात्र करोनामुळे आर्थिक स्थिती आणखी बिकट बनली तर मात्र सोने ८०००० रुपयांपर्यंत वाढेल. जिओजित फायनान्सचे कमॉडिटी विश्लेषक हरीश व्ही. यांच्या मते, करोनाच्या अभूतपूर्व संकटात सोने पुन्हा एकदा सुरक्षित म्हणून लोकप्रिय झाले आहे. आर्थिक सुधारणा आणि डॉलरचे अवमूल्यन नजीकच्या काळात सोन्याला नव्या विक्रमी स्तरावर नेईल, असे त्यांनी सांगितले. मात्र यात नफावसुलीची होण्याची दाट शक्यता त्यांनी व्यक्त केली.
गोल्ड लोन व्यवसायिकांना सुगीचे दिवस
एकीकडे सोन्याचे बाजार मूल्य वाढल्याने सोने तारण कर्जाची मर्यादा देखील वाढण्यात आली आहे. करोनामुळे निर्माण झालेल्या आर्थिक संकटात मार्ग काढण्यासाठी ग्राहक सोने गहाण ठेवून कर्ज काढत आहेत. त्यामुळे ‘गोल्ड लोन’ कंपन्यांना या व्यवसायात प्रचंड वृद्धी दिसत आहे. पुढील दोन ते तीन तिमाहीत ‘गोल्ड लोन’ची मागणी वाढेल, असे मत मुथूट फायनान्सचे व्यवस्थापकीय संचालक अलेक्झॅंडर मुथूट यांनी व्यक्त केले आहे. ते सांगतात की, गेल्या दोन महिन्यात ‘गोल्ड लोन’ व्यवसायात मोठी वृद्धी झाली आहे. आमच्या व्यावसायिक उद्दिष्टापेक्षा १५ टक्के अधिक व्यवसाय झाला. सोने दरात होणारी वृद्धी गोल्ड लोन देणाऱ्या व्यवसायिकांसाठी आणि ग्राहकांसाठी फायदेशीर आहे, असे त्यांनी सांगितले. करोना आणि बड्या अर्थव्यवस्थांसाठी आर्थिक पॅकेज यामुळे सोने आणि चांदीवर परिणाम होत आहे.
Marathi News: मराठी बातम्या, Latest News in Marathi, Breaking Marathi News, Marathi News Paper | Maharashtra Times
