म. टा. विशेष प्रतिनिधी मुंबई : मुंबई महापालिकेचा महत्त्वाकांक्षी प्रकल्प असलेल्या सागरी किनारी मार्गाची बांधकाम पूर्णत्वाची मुदत चुकल्याने तीन कंत्राटदारांना मिळून तब्बल ३१ कोटींचा दंड ठोठावण्यात आला आहे. कामात विलंब झाल्याने प्रकल्प खर्चात २२६ कोटींची वाढ झाली असून ६५ टक्के रक्कम कंत्राटदारांना अदा करण्यात आली आहे. माहितीच्या अधिकारात पालिका प्रशासनाकडून ही माहिती देण्यात आली आहे.

मुंबईची वाहतूककोंडी फोडण्यासाठी पर्याय ठरणाऱ्या सागरी किनारा मार्ग प्रकल्पाची सुरुवात ऑक्टोबर, २०१८मध्ये झाली. आतापर्यंत ७५ टक्क्यांहून अधिक काम पूर्ण झाले आहे. प्रकल्पासाठी बांधकाम क्षेत्रातील तीन बड्या कंपन्यांची नियुक्ती करण्यात आली.

दिलेल्या मुदतीत किती काम पूर्ण झाले, कामात विलंब झाला असल्यास काय दंडात्मक कारवाई करण्यात आली, याची माहिती सामाजिक कार्यकर्ते अनिल गलगली यांनी पालिकेकडे माहितीच्या अधिकारात मागितली होती. पालिकेने दिलेल्या माहितीत आतापर्यंत एक वर्षाचा विलंब झाला असून मुदतीत काम पूर्ण होत नसल्याने नोव्हेंबर २०२३पर्यंत नवीन मुदत देण्यात आली आहे.

वाढीव खर्चाचा भार मुंबईकरांवर?

खर्चात झालेली वाढ लक्षात घेता आकारलेला दंड फारच कमी आहे, असे गलगली यांचे म्हणणे आहे. महत्वाकांक्षी प्रकल्पाची कामे मिळविण्यासाठी कंत्राटदार प्रयत्नशील असतात मात्र एकदा काम मिळाल्यानंतर वेळेत प्रकल्प पूर्ण होत नाहीत. त्यामुळे प्रकल्प खर्चात वाढ होते. सर्वसामान्य मुंबईकरांच्या करातून जमा झालेल्या पैशांतून वाढीव खर्च भागविला जात असल्याची तक्रार गलगली यांनी केली आहे.
Weather Alert: राज्यात मान्सूनची वर्दी, पुढील तीन दिवस महत्त्वाचे, या जिल्ह्याला येलो अलर्ट

प्रकल्पाचे काम तीन भागांमध्ये विभागले आहे.

० भाग १ अंतर्गत प्रियदर्शनी पार्क ते बडोदा पॅलेसपर्यंतचे काम मे. लार्सन अँड टुब्रो यांस दिले असून मूळ खर्चात ९९.७९ कोटींची वाढ झालेली आहे. मूळ कंत्राट खर्च ३,५०५ कोटी रुपये अपेक्षित होता. २० जून, २०२३पर्यंत २,२८६ कोटी कंत्राटदाराला अदा करण्यात आले आहे. आतापर्यंत या कामात ८.५७ कोटींचा दंड आकारला आहे.

-काम पूर्ण करण्याची तारीख १२ ऑक्टोबर, २०२२ होती. नवीन मुदतवाढीनंतर १० सप्टेंबर, २०२३ रोजी काम पूर्ण होईल.

० भाग २ अंतर्गत बडोदा पॅलेस ते वांद्रे वरळी सागरी सेतूच्या दक्षिण टोकापर्यंतचे काम मे. एचसीसी- एचडीसी कंपनीला दिले असून मूळ खर्चात ६२.२५ कोटींची वाढ झालेली आहे. मूळ खर्च २१२५ कोटी अपेक्षित होता. २० जून २०२३ पर्यंत ११९३ कोटी कंत्राटदाराला अदा करण्यात आले आहे. या कामात १५.३७ कोटींचा दंड आकारला आहे.

-काम पूर्ण करण्याची तारीख १५ ऑक्टोबर २०२२ होती. मुदत वाढ दिली असून ७ ऑक्टोबर २०२३ रोजी काम पूर्ण होईल.
गुड न्यूज, महा हाऊसिंग बांधणार १७ हजार घरं, मुंबई ठाण्याजवळ १८ ते ३२ लाखांमध्ये घर मिळणार
-भाग ३ अंतर्गत प्रिन्सेस स्ट्रीट ते प्रियदर्शनी पार्क पर्यंतचे काम मे. लार्सन अँड टुब्रोला दिले असून मूळ खर्चात ६३.८३ कोटींची वाढ झालेली आहे. मूळ खर्च २७९८ कोटी अपेक्षित होता. २० जून २०२३ पर्यंत २१६० कोटी कंत्राटदाराला अदा करण्यात आले आहे. आतापर्यंत या कामात ७.२५ कोटींचा दंड आकारला आहे.

-काम पूर्ण करण्याची तारीख १२ ऑक्टोबर २०२२ होती. मुदतवाढीनंतर २६ नोव्हेंबर २०२३ रोजी काम पूर्ण होईल.
Mumbai Police : मुंबई पोलिसांकडून ऑपरेशन आउट, तब्बल ३३९ जणांची धरपकड, सहा हजार वाहनांची तपासणी, कारण…

LEAVE A REPLY

Please enter your comment!
Please enter your name here